'सर, लक्ष असू द्या!'; देव्हाऱ्यात लावलाय लक्ष्मीकांत बेर्डेंचा फोटो, मराठी अभिनेत्यावर होतोय कौतुकाचा वर्षाव

आज जरी 'लक्ष्या' आपल्यात नसले तरीही त्यांच्या भूमिकांच्या माध्यमातून ते आपल्या सर्वांच्या मनात जिवंत आहेत. अशातच एका मराठी अभिनेत्याने लक्ष्मीकांत यांचा फोटो चक्क देव्हाऱ्यात ठेवलाय

लक्ष्मीकांत बेर्डे यांनी मराठी प्रेक्षकांना त्यांच्या अभिनयाने खळखळून हसवलं. लक्ष्मीकांत बेर्डेंच्या भूमिका आजही प्रेक्षकांच्या स्मरणात आहेत. मराठी आणि हिंदी मनोरंजनविश्व लक्ष्मीकांत यांनी दणाणून सोडलं. आज जरी 'लक्ष्या' आपल्यात नसले तरीही त्यांच्या भूमिकांच्या माध्यमातून ते आपल्या सर्वांच्या मनात जिवंत आहेत. लक्ष्मीकांत यांना अनेक कलाकार गुरुस्थानी मानतात. अशातच एका मराठी अभिनेत्याने लक्ष्मीकांत यांचा फोटो चक्क देव्हाऱ्यात ठेवलाय. हा अभिनेता म्हणजे प्रियदर्शन जाधव.प्रियदर्शनने देव्हाऱ्याचा  फोटो पोस्ट करुन लिहिलंय की, ''१९८३ साली शांतेचं कार्ट चालू आहे हे नाटक रंगभूमीवर आलं आणि अक्षरशः धुमाकूळ घातला या नाटकाने. लक्ष्मीकांत बेर्डे सुधीर जोशी नयनतारा लाली जोग यांनी त्यांच्या भूमिका अजरामर करून ठेवल्या. नाटक तुफान गाजले. श्रीनिवास भणगे लिखित आणि " प्रकाश बुद्धीसागर " दिग्दर्शित हे नाटक सुपरहिट ठरलं. बुद्धीसागर काय कमाल करू शकतात ह्या नाटकाने सिद्ध झालं आणि पुढे त्यांनी अनेक सुपरहिट नाटके दिग्दर्शित केली.''

''आज त्याच नाटकाचा नव्याने प्रयोग होत आहे. 217 प्रयोग केल्यानंतर कोविड मुळे नाटक बंद पडले. आता नाटक पुन्हा नव्या दमाने सुरू होत आहे. लक्ष्मीकांत बेर्डे इतकं धमाकेदार काम मला करताच येणार नाही पण तरीही जमेल तेवढं उत्तम करायचा प्रयत्न करेन. #लक्ष्मीकांत बेर्डे सर.... लक्ष असू द्या ! तुमच्यासारखेच आमच्यावर सुद्धा प्रेक्षक प्रेम करतील आणि शांतेच कार्ट "चालूच" राहील अशी आशा बाळगतो. बाकी................. मजेत ! प्रेक्षकांना नम्र विनंती : खळखळून हसायचं असेल..... तर कार्ट चालूच आहे !'' प्रियदर्शनचं अनेकांनी कौतुक केलं आहे.