आधी नाना पाटेकर तडकाफडकी निघून गेले, आता शाहिद अन् विशाल भारद्वाज यांच्यात बिनसल्याची चर्चा? दिग्दर्शक म्हणाले...

विशाल भारद्वाज आणि शाहिद कपूर या दोघांमध्ये भांडण झालं अशी चर्चा होती. अखेर या चर्चांवर स्वतः दिग्दर्शक विशाल भारद्वाज यांनी मौन सोडलंय

बॉलिवूडमधील प्रसिद्ध दिग्दर्शक विशाल भारद्वाज आणि अभिनेता शाहिद कपूर यांची जोडी जेव्हा पडद्यावर येते, तेव्हा काहीतरी विशेष घडतं. 'कमिने', 'हैदर' आणि 'रंगून' यांसारख्या सुपरहिट चित्रपटांनंतर ही जोडी आता 'ओ रोमियो' (O Romeo) या चित्रपटाच्या निमित्ताने पुन्हा एकदा एकत्र आली आहे. मात्र, गेल्या काही काळापासून या दोघांमध्ये बिनसल्याच्या चर्चांना उधाण आलं होतं. नुकत्याच झालेल्या चित्रपटाच्या ट्रेलर लॉन्च सोहळ्यात विशाल भारद्वाज यांनी यावर आपली स्पष्ट प्रतिक्रिया दिली आहे.

काय म्हणाले विशाल भारद्वाज?

विशाल भारद्वाज यांनी प्रामाणिकपणे या चर्चांना पूर्णविराम दिला. ते म्हणाले, "माझ्या दिग्दर्शक मित्रांना वाटतं की, मला आतापर्यंत ९ नॅशनल पुरस्कार मिळाले. आता  शाहिद कपूरसोबत चार चित्रपट केल्याबद्दल मला १० वा नॅशनल अवॉर्ड मिळायला हवा. पण लोकांना हे माहित नाही की माझ्यासारख्या 'कठीण' माणसासोबत काम करणं किती आव्हानात्मक आहे. खरं तर माझ्यासोबत चार चित्रपट केल्याबद्दल शाहिदलाच नॅशनल अवॉर्ड मिळायला हवा!"

मीडियामध्ये होणाऱ्या भांडणांच्या चर्चांवर भाष्य करताना भारद्वाज म्हणाले, "आमच्यात अनेकदा क्रिएटिव्ह मतभेद होतात आणि आमच्यात भांडणेही होतात. पण मीडियामध्ये या भांडणांची जेवढी चर्चा होते, तेवढी ती मोठी नसतात. आमचं नातं हे लक्ष्मीकांत-प्यारेलाल किंवा कल्याणजी-आनंदजी यांच्यासारखं आहे, जिथे कामाप्रती आदर आणि एकमेकांवरील विश्वास जास्त महत्त्वाचा आहे."

यावेळी शाहिद कपूरनेही विशाल भारद्वाज यांच्यासोबत काम करण्याच्या अनुभवावर भाष्य केलं. तो म्हणाला, "विशाल सरांसोबत काम करणं म्हणजे एखाद्या थरारक प्रवासासारखं असतं. 'कमिने'पासून सुरू झालेला हा प्रवास 'ओ रोमियो'पर्यंत पोहोचला आहे आणि मला त्यांच्या फिल्मोग्राफीचा भाग असल्याचा अभिमान वाटतो."

'ओ रोमियो'बद्दल थोडक्यात

विशाल भारद्वाज दिग्दर्शित 'ओ रोमियो' हा चित्रपट ९० च्या दशकातील मुंबई अंडरवर्ल्डवर आधारित असून यात शाहिद कपूरसोबत तृप्ती डिमरी मुख्य भूमिकेत आहे. या चित्रपटात नाना पाटेकर, फरिदा जलाल आणि विक्रांत मॅसी हे देखील महत्त्वाच्या भूमिकेत दिसणार आहेत. साजिद नाडियाडवाला निर्मित हा चित्रपट १३ फेब्रुवारी २०२६ रोजी प्रदर्शित होणार आहे.