गेल्या आठवड्यात नेटफ्लिक्सवर 'धुरंधर' प्रदर्शित झाल्यानंतर प्रेक्षकांनी चित्रपटातील प्रत्येक लहान-मोठ्या बाबीकडे बारकाईने लक्ष द्यायला सुरुवात केली. संवाद, पार्श्वसंगीत, दृश्यरचना ते अगदी एंड क्रेडिट्सपर्यंत सर्व काही चर्चेत आले. त्याचदरम्यान कलाकारांच्या सुविधांबाबत, विशेषतः रणवीर सिंहच्या वॅनिटी व्हॅनविषयी चर्चा रंगू लागली. सिनेमाच्या शेवटी दिलेल्या क्रेडिट लिस्टमध्ये रणवीर म्हणजेच हमजाच्या ३ व्हॅनिटी व्हॅनचा उल्लेख होता. यावरुन रणवीर ३ व्हॅनिटी व्हॅन वापरतो अशी चर्चा झाली. आता यामागचं खरं सत्य समोर आलं आहे.
हिंदुस्तान टाइम्सने केलेल्या पडताळणीत स्पष्ट झाले आहे की हा दावा केवळ सोशल मीडियावरील अंदाजांवर आधारित होता. रेडिटवर एका युजरने चित्रपटाच्या एंड क्रेडिट्सचा स्क्रीनशॉट शेअर केला होता. त्यामध्ये रणवीर सिंगच्या ‘हमजा’ या पात्राच्या नावाखाली हमजा व्हॅन, हमजा स्टाफ व्हॅन आणि हमजा नॉर्मल व्हॅन असे उल्लेख दिसत होते. याच आधारावर रणवीरसाठी तीन वॅनिटी व्हॅन वापरल्या गेल्याचा समज पसरला.मात्र याबाबत स्पष्टीकरण देताना प्रोडक्शनशी संबंधित एका सूत्राने सांगितले की, येथे “व्हॅन” म्हणजे वॅनिटी व्हॅन नव्हे. या थायलंड शूटदरम्यान वापरण्यात आलेल्या सामान्य वाहतूक गाड्या होत्या. हिंदुस्तान टाईम्स रिपोर्टनुसार, “बँकॉक शेड्यूलदरम्यान वापरल्या गेलेल्या या थाई व्हॅन्स होत्या. शूटिंग दीर्घकाळ चालू असल्याने एक वॅनिटी व्हॅन आणि दोन साध्या गाड्या अभिनेता, त्यांचा स्टाफ आणि शूटिंगचे साहित्य वेगवेगळ्या लोकेशन्सवर नेण्यासाठी वापरण्यात आल्या. बँकॉक शेड्यूलमध्ये बहुतेक सीन बाहेरच्या लोकेशन्सवर होते. संपूर्ण शहरात सतत हालचाल सुरू असल्याने आणि अनेक ठिकाणी शूटिंग करावी लागत असल्याने एवढी वाहतूक व्यवस्था आवश्यक होती."
रणवीर सिंहने या चित्रपटासाठी प्रचंड शारीरिक परिवर्तन केले. कधी त्याने १५ किलो वजन घटवले, तर कधी २५ किलो वजन वाढवले. तेही काही महिन्यांत किंवा अगदी काही दिवसांत. यासोबतच त्याने रोज १२ ते १४ तास शूटिंग केलं. अशा मोठ्या बॉडी ट्रान्सफॉर्मेशनसाठी सेटवर जिम, खास आहार किंवा खाजगी शेफ यांसारख्या सुविधांची गरज असते, जेणेकरून ठरलेल्या वेळेत काम पूर्ण करता येईल. रणवीरला कोणतीही ‘अतिरिक्त लक्झरी’ देण्यात आलेली नव्हती, तर केवळ शूटिंग आणि त्याच्या कामाच्या गरजेनुसार आवश्यक त्या सुविधा उपलब्ध करून देण्यात आल्या होत्या.
'धुरंधर' आणि त्याचा पुढचा भाग धुरंधर: द रिव्हेंज यांचे शूटिंग एकाच वेळी करण्यात आले होते. सुरुवातीला हा चित्रपट एकाच भागात प्रदर्शित करण्याचा विचार होता. मात्र चित्रपटाची लांबी अधिक असल्याने नंतर तो दोन भागांत विभागण्यात आला. धुरंधर: द रिव्हेंजचा पोस्टर आणि टीझर प्रदर्शित झाल्यानंतर रणवीर सिंहचं ट्रान्सफॉर्मेशन पुन्हा एकदा चर्चेचा विषय ठरलं आहे. यावेळी तो अधिक शार्प, डार्क आणि दमदार अवतारात दिसत असून ‘हमजा’ या पात्राचा आणखी तीव्र आणि प्रभावी पैलू प्रेक्षकांसमोर येणार असल्याचे संकेत मिळत आहेत. त्यामुळे सीक्वलबाबतची उत्सुकता आणखी वाढली आहे.