Share Market: सोमवारी, आठवड्याच्या पहिल्या व्यवहार दिवशी, देशांतर्गत शेअर बाजाराची सुरुवात घसरणीसह झाली. जागतिक संकेतांमधील मंदी आणि गुंतवणूकदारांच्या सावधगिरीच्या पार्श्वभूमीवर, सकाळी कामकाजाच्या सुरुवातीला बीएसई सेन्सेक्स २०६.१५ अंकांनी घसरून ८२,२९४.३२ च्या पातळीवर व्यवहार करताना दिसला. त्याचप्रमाणे, एनएसई निफ्टी देखील ५७.७० अंकांनी घसरून २५,०९२.१५ च्या पातळीवर व्यवहार करत होता. बाजारात विक्रीचा दबाव दिसून आला. गुंतवणूकदार आता आगामी प्रमुख आर्थिक आकडेवारी आणि जागतिक घडामोडींकडे लक्ष देत आहेत.
या शेअर्समध्ये घसरण / तेजी
सुरुवातीच्या व्यापार सत्रात, वीज, ऑईल आणि नॅचरल गॅस, सार्वजनिक क्षेत्रातील बँका वगळता, इतर सर्व क्षेत्रीय निर्देशांक लाल रंगात व्यवहार करताना दिसले. आयटी आणि मीडियामध्ये ०.५-०.५ टक्क्यांनी घसरण झाली. याशिवाय सन फार्मा, एसबीआय लाईफ इन्शुरन्स, अपोलो हॉस्पिटल्स, पॉवर ग्रिड कॉर्प, टायटन कंपनीचे शेअर्स निफ्टीवर वाढले, तर इन्फोसिस, टेक महिंद्रा, बजाज फायनान्स, भारत इलेक्ट्रॉनिक्स आणि टाटा मोटर्सचे शेअर्स घसरले. बीएसई मिडकॅप आणि स्मॉलकॅप निर्देशांक स्थिर व्यवहार करत होते.
पैसे बुडणार नाहीत, तर वाढतील; ‘हे’ आहेत गुंतवणकीचे सुरक्षित पर्याय, गुंतवू शकता तुम्ही पैसा
या कंपन्यांचे तिमाही निकाल येणार
एचसीएल टेक्नॉलॉजीज, ओला इलेक्ट्रिक मोबिलिटी, टाटा टेक्नॉलॉजीज, तेजस नेटवर्क्स, नेल्को, रॅलिस इंडिया, ऑथम इन्व्हेस्टमेंट, डेन नेटवर्क्स, केसोराम इंडस्ट्रीज आणि संभव स्टील ट्यूब्स आज त्यांचे तिमाही निकाल जाहीर करण्याची शक्यता आहे.
आशियाई बाजार कल
अमेरिकेचे अध्यक्ष डोनाल्ड ट्रम्प यांनी आठवड्याच्या शेवटी युरोपियन युनियन आणि मेक्सिकोवर लादलेल्या ३० टक्के करानंतर गुंतवणूकदारांच्या प्रतिक्रियांमुळे सोमवारी आशियाई बाजारात संमिश्र स्थिती होती. जपानचा निक्केई २२५ ०.३३ टक्क्यांनी घसरला, तर टॉपिक्स निर्देशांक ०.२१ टक्के घसरला. त्याचप्रमाणे, दक्षिण कोरियामध्ये, कोस्पी ०.२२ टक्के आणि स्मॉल-कॅप कोस्डॅक ०.१९ टक्क्यांनी वधारला. दरम्यान, ऑस्ट्रेलियाचा एस अँड पी/एएसएक्स २०० निर्देशांक ०.१ टक्क्यानं घसरला. दरम्यान, सोमवार, १४ जुलै रोजी हाँगकाँगचा हँग सेंग निर्देशांकात बदल झाला नाही.