Sensex Share Bazar: सलग चौथ्या दिवशी शेअर बाजारात उत्साह पाहायला मिळाला. गुरुवारी दिवसभराच्या कामकाजानंतर निफ्टी आणि सेन्सेक्स मजबूत वाढीसह बंद झाले. निफ्टी ५ आठवड्यांतील सर्वोच्च पातळीवर बंद झाला. तर बीएसईच्या सर्व सेक्टरमध्ये तेजी दिसून आली. मिडकॅप आणि स्मॉलकॅप शेअर्समध्येही खरेदी दिसून आली. आजच्या वाढीसह, निफ्टी आता १३ फेब्रुवारीनंतरच्या सर्वोच्च पातळीवर पोहोचला आहे. सेन्सेक्स आणि निफ्टी १% पेक्षा जास्त वाढले आहेत. निफ्टी २३,२०० आणि सेन्सेक्स ७६,३०० इंट्राडे पार करण्यात यशस्वी झाला. निफ्टी बँक देखील इंट्राडे ५०,१०० पार करण्यात यशस्वी झाली. बाजाराच्या तेजीचे ५ कारणे समोर आली आहेत.
या शेअर्समध्ये आज चढउतार
AGR थकबाकीशी संबंधित बातम्यांनंतर भारती एअरटेल ४% वाढीसह बंद झाला. निफ्टीच्या सर्वात वेगाने वाढणाऱ्या समभागांमध्ये टायटन अव्वल स्थानावर राहिला. या समभागातही सुमारे ४% वाढ दिसून आली. टीव्हीएस मोटर, आयशर मोटर्स, बजाज ऑटो आणि हीरो मोटोकॉर्प सारख्या ऑटो समभागांमध्ये आज खरेदी झाली आणि ते १-३% च्या वाढीसह बंद झाले. आरआयएल, टीसीएस, एचडीएफसी बँक आणि इन्फोसिस सारख्या बड्या समभागांमध्ये झालेल्या खरेदीमुळे निफ्टीमध्ये वाढ झाली.
नवीन ऑर्डर मिळाल्याच्या वृत्तानंतर आजही संरक्षण समभागांमध्ये खरेदी झाली. भारत फोर्ज ५% वर बंद झाला. पण, चांगल्या ट्रेडिंग सत्रातही इंडसइंड बँक आणि बजाज फायनान्स तोट्यासह बंद झाले. केईआय इंडस्ट्रीज १३%, पॉलीकॅब ७% आणि हॅवेल्स ५% ने बंद झाले. तार आणि केबल उद्योगात अदानी समूहाच्या प्रवेशाने त्यांना आज धक्का बसला. UPI साठी सरकारकडून कमी प्रोत्साहनामुळे पेटीएम ४% ने बंद झाला. सकारात्मक ब्रोकरेज नोट्सचा प्रभाव सिटी गॅस वितरण समभागांवर दिसून आला आणि IGL २% आणि MGL ३% वर बंद झाला. मजबूत ऑप्शन्स डेटानंतर एमसीएक्समध्ये वाढ दिसून आली. हा स्टॉक ५ सत्रांमध्ये १२% वाढला आहे. कच्च्या तेलात नरमता आल्याने, तेल विपणन कंपन्यांमध्ये १-३% वाढ दिसून आली.
बाजारातील तेजीची ५ कारणे
- जागतिक बाजारात आझ चांगले संकेत पाहायला मिळाले. अमेरीका, ऑस्ट्रेलिया दक्षिण कोरिया या देशांच्या बाजारात तेजी पाहायला मिळाली. तर हाँगकाँगमध्ये किंचित घसरण झाली.
- अमेरिकेच्या फेडने व्याजदर ४.२५%-४.५०% वर स्थिर ठेवले असून यावर्षी दोनवेळा कपात करण्याचे संकेत दिले आहेत. पॉवेल यांनी ट्रम्प टॅरिफमुळे महागाई वाढण्याचा अंदाज वर्तवला. ते म्हणाले की, वाढीचा अंदाजही कमी झाला असून महागाई वाढण्याची अपेक्षा आहे.
- पॉवेल यांनी मंदीची जोखमी कमी झाल्याचे सांगितले. ज्यामुळे गुंतवणूकदारांच्या चिंता कमी झाल्या. फेडने वाढीच्या अंदाजात कपात केल्यामुळे रोख्यांमध्ये वाढ झाली. आगामी काळात, ताळेबंद सुधारण्यासाठी फेड रोखे विक्रीला गती देऊ शकते.
- आयटी शेअर्समध्ये आठवडाभरातील सर्वात मोठी वाढ दिसून आली. Mphasis, LTIMindtree, Wipro, Coforge, Infosys, TCS वाढीसह बंद झाले.
- निफ्टी स्मॉलकॅप १.५०%, निफ्टी मिडकॅप ०.८७% वर बंद झाला. केईआय, वेलस्पन, भारत फोर्ग, थरमॅक्समध्ये सर्वाधिक वाढ दिसून आली.