Stock Markets : गेल्या दोन दिवसांतील तेजीला पूर्णविराम देत भारतीय शेअर बाजारात शुक्रवारी पुन्हा एकदा मोठी घसरण पाहायला मिळाली. सकाळी बाजार उघडताच सेन्सेक्स आणि निफ्टीवर विक्रीचा प्रचंड दबाव दिसून आला. सेन्सेक्स १२०० अंकांच्या पडझडीसह ७४,००० च्या स्तरावर आला, तर निफ्टी ३६१ अंकांनी घसरुन २३,००० च्या महत्त्वपूर्ण पातळीच्या खाली गेला. युद्धाची अनिश्चितता आणि कमकुवत जागतिक संकेतांमुळे गुंतवणूकदारांनी आज मोठ्या प्रमाणावर नफावसुली केली.
बाजारातील घसरणीची ७ प्रमुख कारणे
१. नफावसुलीचा तडाखा: २४ आणि २५ मार्च रोजी बाजार ३.५ टक्क्यांनी सावरला होता. उच्च पातळीवर अडकलेल्या गुंतवणूकदारांनी आज नफा पदरात पाडून घेण्यासाठी विक्रीचा सपाटा लावला.
२. मध्य-पूर्वेतील तणाव कायम : अमेरिकन राष्ट्राध्यक्ष डोनाल्ड ट्रम्प यांनी इराणवरील हल्ल्याला ६ एप्रिलपर्यंत स्थगिती दिली असली, तरी इराणकडून नरमाईचे संकेत मिळालेले नाहीत. या अनिश्चिततेचा फटका बाजाराला बसला.
३. जागतिक बाजारातील विक्री : अमेरिकन बाजार २ टक्क्यांनी घसरल्याने त्याचे पडसाद आशियाई बाजारात उमटले. दक्षिण कोरियाचा बाजार २.७% तर तैवानचा बाजार १.४% टक्क्यांनी कोसळला.
४. कच्च्या तेलाचा भडका : ब्रेंट क्रूडचे भाव पुन्हा उसळले असून ते १०८ डॉलर प्रति बॅरलवर पोहोचले आहेत. भारतासारख्या आयातदार देशासाठी ही चिंतेची बाब आहे.
५. रुपयाचा ऐतिहासिक निचांक : डॉलरच्या तुलनेत भारतीय रुपया ९४.४४ या आतापर्यंतच्या सर्वात नीचांकी पातळीवर गेला आहे. २८ फेब्रुवारीपासून सुरू झालेल्या युद्धानंतर रुपयात ४ टक्क्यांची घसरण झाली आहे.
६. परकीय गुंतवणूकदारांची पाठ : बाजार वधारत असतानाही परकीय गुंतवणूकदार सलग विक्री करत आहेत, ज्यामुळे बाजारातील वाढ टिकून राहणे कठीण झाले आहे.
७. India VIX मध्ये ७.५% वाढ : बाजारातील अस्थिरता दर्शवणारा 'इंडिया विक्स' २६.५३ च्या स्तरावर गेला आहे. हे नजीकच्या काळात बाजारात मोठी उलथापालथ होण्याचे संकेत आहेत.
(टीप - यामध्ये सामान्य माहिती देण्यात आलेली आहे. हा गुंतवणूकीचा सल्ला नाही. शेअर बाजारातील गुंतवणूक जोखमीच्या अधीन असते. कोणत्याही प्रकारची गुंतवणूक करण्यापूर्वी या क्षेत्रातील जाणकार किंवा तज्ज्ञांचा सल्ला घेणं आवश्यक आहे.)