Tata Teleservices (Maharashtra) Ltd :शेअर बाजारात आज (गुरुवारी) दिवसभर मंदीचं वातावरण असूनही, टाटा समूहाच्या टाटा टेलिसर्व्हिसेस (महाराष्ट्र) (TTML) कंपनीच्या शेअर्सनी मात्र कमाल केली आहे! आज हा शेअर जवळपास ८ टक्क्यांनी वधारून ७४.७० रुपयांवर पोहोचला. विशेष म्हणजे, कालच्या (बुधवारी) बाजारातील मंदीतही या शेअरने १५% ची वाढ कायम राखला होता.
टीटीएमएलचा झंझावात
गेल्या केवळ दोन व्यापारी दिवसांत, टीटीएमएलच्या शेअरच्या किमतीत तब्बल २८ टक्क्यांनी वाढ झाली आहे. गेल्या नऊ ट्रेडिंग सत्रांमध्ये, ९ मे २०२५ रोजी ५१.५३ रुपयांवरून हा शेअर ४५ टक्क्यांनी वाढला आहे. ७ मे २०२५ रोजी या कंपनीच्या शेअर्सने ५२ आठवड्यांच्या नीचांकी पातळी गाठली होती, पण तिथून त्याने जोरदार मुसंडी मारली आहे.
आजच्या व्यवहारात एनएसई (NSE) आणि बीएसई (BSE) वर मिळून तब्बल ३२.३६ लाख इक्विटी शेअर्सचे व्यवहार झाले, ज्यामुळे या काउंटरवरील (शेअरवरील) सरासरी व्यवहार दुप्पट झाला. सकाळी ०९:२७ वाजता बीएसई सेन्सेक्स (BSE Sensex) ०.८५ टक्क्यांनी घसरून ८०,९००.६२ वर व्यवहार करत असतानाही टीटीएमएलने ही तेजी कायम राखली.
टाटा समूहाची चिंता आणि भविष्यातील गुंतवणूक
१५० अब्ज डॉलर्सच्या टाटा ग्रुपची होल्डिंग कंपनी टाटा सन्स लिमिटेडला त्यांच्या तोट्यात चाललेल्या दूरसंचार कंपनी टाटा टेलिसर्व्हिसेस लिमिटेड (TTSL) मध्ये नवीन भांडवल गुंतवावे लागू शकते, असे बिझनेस स्टँडर्डने म्हटले आहे. कारण TTSL ला मार्च २०२६ पर्यंत केंद्र सरकारला इतर देण्यांसह १९,२५६ कोटी रुपये समायोजित ढोबळ महसूल (AGR) भरायचे आहेत. यामुळे, कंपनीसाठी भविष्यात आणखी गुंतवणूक आवश्यक असण्याची शक्यता आहे.
गुंतवणूकदारांना 'मल्टीबॅगर' नफा
टीटीएमएलच्या शेअर्समधील सर्वात खास गोष्ट म्हणजे, या शेअरने गेल्या पाच वर्षांत गुंतवणूकदारांना २९०० टक्क्यांपर्यंत परतावा दिला आहे! गेल्या सहा महिन्यांतही त्याचे शेअर्स १५ टक्क्यांनी वाढले आहेत. याचा अर्थ, जर एखाद्या गुंतवणूकदाराने पाच वर्षांपूर्वी या मल्टीबॅगर स्टॉकमध्ये १ लाख रुपये गुंतवले असते, तर आज त्याच्या गुंतवणुकीचे मूल्य २९ लाखांपेक्षा जास्त (२,९८१,१३२ रुपये) झाले असते. पाच वर्षांपूर्वी या शेअरची किंमत केवळ २.६५ रुपये होती, जी आज वाढून ७९.४५ रुपये झाली आहे.
वाचा - ITR भरताना घाई करताय? थांबा! 'या' २ गोष्टी पूर्ण नसतील तर मिळणार नाही रिफंड; अनेकजण करतात चूक
या आकड्यांवरून असे दिसते की टीटीएमएलने आपल्या गुंतवणूकदारांना भरघोस नफा कमावून दिला आहे, आणि बाजारातील मंदीतही त्याचे प्रदर्शन लक्षवेधी ठरले आहे.