Sensex Closing Bell : ट्रम्प टॅरिफची दहशत हळूहळू कमी होत असून गुंतवणूकदारांचा विश्वास वाढत चालला आहे. परिणामी सलग सातव्या दिवशी बाजार वाढीसह बंद झाला. आजच्या वाढीसह, निफ्टीने आता ४ महिन्यांचा उच्चांक गाठला आहे. डिसेंबर २०२४ नंतर पहिल्यांदाच निफ्टीने पुन्हा एकदा २४,३०० चा स्तर गाठला आहे तर सेन्सेक्स ८०,००० च्या वर पोहोचला आहे. सेन्सेक्स ५२१ अंकांनी वाढून ८०,११६ वर पोहोचला तर निफ्टी १६२ अंकांनी वाढून २४,३२९ वर पोहोचला. निफ्टी बँक २७७ अंकांनी घसरून ५५,३७० वर पोहोचला आणि मिडकॅप निर्देशांक ६४४ अंकांनी वाढून ५५,०४१ वर पोहोचला.
एचसीएल टेकच्या चांगल्या निकालांमुळे आयटी शेअर्समध्ये खरेदी वाढली असून निफ्टी आयटीमध्ये ४% वाढ झाली. आयटी निर्देशांकात ९ महिन्यांतील सर्वात मोठी एका दिवसाची वाढ दिसून आली, सर्व घटकांमध्ये ३-६% वाढ झाली आहे.
कोणत्या शेअर्समध्ये चढउतार?
मंगळवारी निफ्टी बँक तेजीत होता. अलिकडच्या खरेदीनंतर बँकांनी नफा बुकिंग केल्याने निफ्टी बँक ०.५% घसरला. बँकिंग क्षेत्रातील दिग्गज कंपन्यांवर उच्च पातळीवरून दबाव दिसून आला. एचडीएफसी बँक आणि कोटक महिंद्रा बँकेत कमकुवतपणा दिसून आला. बहुतेक ऑटो शेअर्स हिरव्या रंगात बंद झाले. एम अँड एम आणि टाटा मोटर्सच्या शेअरमध्ये वाढ दिसून आली. टेस्लाच्या सकारात्मक टिप्पणीनंतर सोना बीएलडब्ल्यू ६% ने वाढला.
मार्च महिन्यातील विमा कंपन्यांचा डेटा प्रसिद्ध झाल्यानंतर एचडीएफसी लाईफच्या शेअर्समध्ये घट दिसून आली. त्याच वेळी, आयसीआयसीआय प्रुडेन्शियल लाइफमध्ये वाढ झाली. अरबिंदो फार्माला १.८ अब्ज डॉलर्सच्या बाजारपेठेतील औषधासाठी यूएस एफडीएकडून मान्यता मिळाली आहे, त्यानंतर स्टॉक ५% च्या वाढीसह बंद झाला.
वाचा - हे पहिल्यांदाच घडलं.. गौतम अदानींचा 'या' व्यवसायातून काढता पाय; सुनील मित्तल यांना विकण्याची तयारी
आंतरराष्ट्रीय आणि देशांतर्गत बाजारात सोन्याच्या किमती घसरल्याने मुथूट फायनान्सचा शेअर ३% पेक्षा जास्त घसरला. हॅवेल्सने चौथ्या तिमाहीतील चांगले निकाल नोंदवले. पण, नकारात्मक टिप्पणीमुळे शेअरवर दबाव आला आणि तो ३% ने घसरून बंद झाला. एसी कंपन्यांबद्दल बोलायचे झाले तर, व्होल्टास, क्रॉम्प्टन ग्रीव्हज आणि ब्लू स्टारमध्ये दबाव दिसून आला.