Share Market Investment: भारतीय शेअर बाजाराची शुक्रवारी अत्यंत खराब सुरुवात झाली. सकाळी ९ वाजून १५ मिनिटांनी बीएसई सेन्सेक्स ५३७.४३ अंकांनी कोसळून ७९,४७८.४७ च्या पातळीवर व्यवहार करत होता. त्याच वेळी, एनएसई निफ्टी देखील १५३.८५ अंकांनी घसरून २४,६१२.०५ च्या पातळीवर आला होता.
सुरुवातीच्या सत्रात निफ्टीवर भारत इलेक्ट्रॉनिक्स, इन्फोसिस, एचसीएल टेक, टीसीएस आणि विप्रो या आयटी आणि डिफेन्स क्षेत्रातील शेअर्समध्ये मजबूत खरेदी दिसून आली. याउलट, इंटरग्लोब एव्हिएशन, आयसीआयसीआय बँक, टाटा स्टील, अल्ट्राटेक सिमेंट आणि एल अँड टी यांसारख्या प्रमुख शेअर्सना मोठ्या नुकसानीचा सामना करावा लागला.
रुपया ५ पैशांनी घसरला
आंतरराष्ट्रीय बाजारातील वाढता तणाव आणि कच्च्या तेलाच्या वाढत्या किमतींमुळे शुक्रवारी, ६ मार्च रोजी भारतीय रुपया अमेरिकन डॉलरच्या तुलनेत कमकुवत झाला. परकीय चलन बाजारात रुपया ५ पैशांच्या घसरणीसह ९१.६५ प्रति डॉलरवर उघडला, तर मागील सत्रात तो ९१.६० वर बंद झाला होता. यापूर्वी ५ मार्च रोजी रुपया विक्रमी नीचांकी पातळीवरून थोडा सावरला होता.
बाजार तज्ज्ञांच्या मते, रिझर्व्ह बँक ऑफ इंडियाच्या (RBI) संभाव्य हस्तक्षेपामुळे रुपयाला थोडा आधार मिळाला होता. मात्र, कच्च्या तेलाच्या वाढत्या किमतींमुळे ही मजबूती टिकण्याबाबत शंका व्यक्त केली जात आहे. सध्या जागतिक बेंचमार्क ब्रेंट क्रूड ८४.४६ डॉलर प्रति बॅरलच्या आसपास व्यवहार करत आहे.
जागतिक बाजारपेठांवरही युद्धाचं सावट
इराणसोबतच्या युद्धामुळे कच्च्या तेलाच्या किमती २०२४ च्या उन्हाळ्यानंतरच्या सर्वोच्च पातळीवर पोहोचल्या आहेत, ज्याचा परिणाम गुरुवारी वॉल स्ट्रीटवर दिसून आला. एस अँड पी ५०० मध्ये घसरण दिसून आली. डाऊ जोन्स इंडस्ट्रियल एव्हरेजमध्ये एका वेळी १,१०० पेक्षा जास्त अंकांची घसरण झाली होती, जो अखेर ७८४ अंक किंवा १.६ टक्क्यांच्या नुकसानीसह बंद झाला.
तसंच नॅस्डॅक कंपोझिट ०.३ टक्क्यांनी घसरला. जगभरातील आर्थिक बाजारपेठा सध्या तेलाच्या किमतींवर अवलंबून आहेत. तेलाच्या किमतीत झालेली वाढ जागतिक अर्थव्यवस्था कमकुवत करू शकते, सर्वसामान्यांच्या खर्चाच्या क्षमतेवर परिणाम करू शकते आणि व्याजदर वाढवू शकते, अशी भीती व्यक्त केली जात आहे.