Adani Group News: शेअर बाजारात गुरुवारी कामकाजादरम्यान तेजी दिसून आली, मात्र सेक्टर स्पेसिफिक बातम्यांमुळे पॉलीकॅब, हॅवेल्स इंडिया, केईआय इंडस्ट्रीजच्या शेअर्समध्ये मोठी घसरण झाली. अदानी समूहाची कंपनी केबल वायर व्यवसायात उतरल्याच्या वृत्तानंतर ही घसरण झाली.
पॉलीकॅब इंडिया आणि हॅवेल्स इंडियासह इतर वायर आणि केबल (डब्ल्यू अँड सी) कंपन्यांचे शेअर्स गुरुवारी ९ टक्क्यांपर्यंत घसरले. अदानी एंटरप्रायझेसनं प्रणिता व्हेंचर्ससोबत कच्छ कॉपर लिमिटेड (KCL) या पूर्ण मालकीच्या उपकंपनीच्या संयुक्त उपक्रमाद्वारे केबल आणि वायर उद्योगात प्रवेश करण्याची घोषणा केली. त्यानंतर पॉलीकॅब इंडियाचा शेअर बीएसईवर ७.८ टक्क्यांनी घसरून ५,०१५.६० रुपयांच्या दिवसाच्या नीचांकी पातळीवर पोहोचला. दरम्यान, हॅवेल्स इंडियाचा शेअर ५.४ टक्क्यांनी घसरला.
केबल व्यवसायातील प्रवेशामुळे खळबळ
प्रणिता इकोकेबल्स लिमिटेड (PEL) ही अदानी समूहाच्या संयुक्त उपक्रमात स्थापन झालेली नवीन कंपनी धातूची उत्पादनं, केबल्स आणि वायर्सचं उत्पादन, विपणन आणि वितरणाच्या व्यवसायात गुंतणार आहे. कंपनीनं आपल्या एक्सचेंज फायलिंगमध्ये या संदर्भातील माहिती दिली. आम्ही सूचित करू इच्छितो की कच्छ कॉपर लिमिटेड (KCL) या कंपनीच्या पूर्ण मालकीच्या उपकंपनीला १९ मार्च २०२५ रोजी मान्यता मिळाली. केसीएलकडे पीईएलच्या इक्विटी भागभांडवलाच्या ५०% हिस्सा असेल, असं त्यांनी म्हटलं.
पीईएलची स्थापना प्रत्येकी १०,००,००० रुपयांच्या अधिकृत आणि पेड-अप भागभांडवलासह करण्यात आलीये आणि प्रत्येकी १० रुपयांच्या १००,००० इक्विटी शेअर्समध्ये विभागली गेलीये. पीईएलमध्ये केसीएलचा ५० टक्के हिस्सा असेल, तर उर्वरित हिस्सा प्रणिता व्हेंचर्सचा असेल. पॉलीकॅब, हॅवेल्स, फिनोलेक्स केबल्स आणि केईआय इंडस्ट्रीज सारख्या कंपन्यांचं वर्चस्व आहे. या सेगमेंटमध्ये अदानींच्या एन्ट्रीनं काय परिणाम दिसून येणार हे पाहावं लागेल.
अट्राटेकनंही या क्षेत्रातील एन्ट्रीची केली होती घोषणा
अल्ट्राटेक सिमेंटनं फेब्रुवारी २०२५ च्या शेवटच्या आठवड्यात वायर आणि केबल व्यवसायात प्रवेश करण्याची घोषणा केली होती आणि पुढील दोन वर्षांत १८०० कोटी रुपयांची गुंतवणूक करणार असल्याचं त्यांनी सांगितलं होतं. या बातमीनंतरही पॉवर केबल स्टॉक्समध्ये घसरण झाली.
(टीप : यामध्ये सामान्य माहिती देण्यात आलेली आहे. हा गुंतवणूकीचा सल्ला नाही. कोणत्याही प्रकारची गुंतवणूक करण्यापूर्वी क्षेत्रातील जाणकार किंवा तज्ज्ञांचा सल्ला घेणं आवश्यक आहे.)