Robert Kiyosaki : 'रिच डॅड पुअर डॅड' या प्रसिद्ध पुस्तकाचे लेखक आणि अमेरिकन गुंतवणूकदार रॉबर्ट कियोसाकी यांनी जागतिक अर्थव्यवस्थेविषयी चिंता व्यक्त केली आहे. त्यांनी इशारा दिला आहे की, नजीकच्या काळात जगभरातील मालमत्तांचे फुगे फुटू शकतात आणि बेरोजगारी वेगाने वाढू शकते. अशा परिस्थिती गुंतवणूकदारांनी काय काळजी घ्यावी? कोणत्या क्षेत्रात गुंतवणूक करावी याचाही सल्ला दिला आहे.
कियोसाकी यांनी आपल्या सोशल मीडिया पोस्टमध्ये (X) सांगितले की, इतिहासातील सर्वात मोठा क्रॅश 'थँक्सगिव्हिंग'च्या दिवशी सुरू झाला आहे. त्यांनी आपल्या फोलोअर्सला या संकटातून वाचण्यासाठी उर्जा क्षेत्रात गुंतवणूक करण्याचा आणि श्रीमंत होण्याची रणनीतीही सांगितली आहे.
जपानमुळे फुटणार '३० वर्षांचा बबल' :
कियोसाकी यांच्या अंदाजानुसार, या संकटाचे मूळ जपानमध्ये आहे. कियोसाकी म्हणतात की, गेल्या ३० वर्षांपासून जपान कमी व्याजदरात जगभरातील गुंतवणूकदारांना कर्ज देत होता. हा पैसा रियल इस्टेट, स्टॉक मार्केट, बॉन्ड्स, कमोडिटीज आणि व्यवसाय यामध्ये गुंतवला गेला. यालाच जपानचा 'कॅरी ट्रेड' म्हणतात.
या कॅरी ट्रेडमुळेच जगातील मालमत्तांचे मूल्य अवाजवी वाढले आणि एक खूप मोठा आर्थिक फुगा तयार झाला.
कियोसाकी यांच्या मते, जपानने आता या फुग्यात सुई टोचली आहे आणि इतिहासातील सर्वात मोठा क्रॅश थँक्सगिव्हिंगपासून सुरू झाला आहे.
लाखो लोकांना बसणार फटका :
कियोसाकी यांनी गंभीर इशारा दिला की, ३० वर्षांचा हा फुगा फुटल्यास अनेक लोक मोठ्या अडचणीत सापडतील. लाखो लोक बेरोजगार होऊन रस्त्यावर येऊ शकतात.
क्रॅशमध्येही श्रीमंत होण्याची संधी :
कियोसाकी यांच्या मते, सद्यस्थिती लोकांना एक अशी संधी देत आहे की, जागतिक अर्थव्यवस्था कोसळली तरीही लोक श्रीमंत बनू शकतात. त्यांनी पुढील काही दिवसांत या संकटातून वाचण्यासाठी १० महत्त्वाच्या टिप्स शेअर करणार असल्याचे सांगितले आहे.
एनर्जी सेक्टरमध्ये गुंतवणूक करण्याचा सल्ला :
या संकटाच्या काळात कियोसाकी यांनी एनर्जी सेक्टर (तेल आणि नैसर्गिक वायू) मध्ये गुंतवणूक करण्याचा सल्ला दिला आहे.
"आपल्याला सर्वांना माहीत आहे की आर्टिफिशियल इंटेलिजन्स लाखो नोकऱ्या संपवणार आहे. एआयलाला वेगाने वाढण्यासाठी खूप जास्त ऊर्जेची गरज असल्याने तेल आणि नैसर्गिक वायू निर्मिती कंपन्यांमध्ये गुंतवणूक करत असल्याचे कियोसाकी यांनी सांगितले.
तुम्ही प्रायव्हेट इक्विटीद्वारे तेल आणि वायू कंपन्यांमध्ये गुंतवणूक करू शकता, किंवा तुमचे आर्थिक सल्लागार, स्टॉक ब्रोकर यांच्या मदतीने एनर्जी कंपन्यांचे विशेष स्टॉक, ईटीएफ किंवा म्युच्युअल फंड खरेदी करू शकता.
(टीप - यामध्ये सामान्य माहिती देण्यात आलेली आहे. हा गुंतवणूकीचा सल्ला नाही. शेअर बाजारातील गुंतवणूक जोखमीच्या अधीन असते. कोणत्याही प्रकारची गुंतवणूक करण्यापूर्वी या क्षेत्रातील जाणकार किंवा तज्ज्ञांचा सल्ला घेणं आवश्यक आहे.)