Silver Hallmarking : सरकार आता सोन्याप्रमाणेच चांदीच्या दागिन्यांवरही शुद्धतेची गॅरंटी देण्याची तयारी करत आहे. १ सप्टेंबर २०२५ पासून चांदीच्या ज्वेलरीसाठी हॉलमार्किंगचा नवा नियम लागू होणार आहे. सध्या हा नियम अनिवार्य नसून ऐच्छिक असेल. म्हणजेच, ग्राहक हॉलमार्क असलेले किंवा हॉलमार्क नसलेले दागिने खरेदी करू शकतात. मात्र, तज्ज्ञांच्या मते, भविष्यात ग्राहक हळूहळू हॉलमार्क असलेल्या चांदीलाच अधिक पसंती देतील.
काय आहे नवा बदल?
भारतीय मानक ब्युरो (BIS) ने चांदीच्या शुद्धतेसाठी ६ मानक निश्चित केले आहेत. ८००, ८३५, ९००, ९२५, ९७० आणि ९९०. आता प्रत्येक हॉलमार्क केलेल्या दागिन्यावर एक ६-अंकी युनिक कोड (HUID) असेल. या कोडमुळे दागिन्यांची शुद्धता आणि सत्यता त्वरित कळेल. ही नवीन प्रणाली जुन्या पद्धतीची जागा घेईल आणि दागिन्यांच्या विक्रीमध्ये अधिक पारदर्शकता आणेल.
हॉलमार्किंग का गरजेचं आहे?
हॉलमार्किंग म्हणजे धातूच्या शुद्धतेची पडताळणी करणे. बीआयएसच्या प्रयोगशाळेत तपासणी केल्यानंतर दागिन्यांवर हा विशिष्ट हॉलमार्क लावला जातो. यामुळे ग्राहकांना हा विश्वास मिळतो की ते ज्या दागिन्यांसाठी पैसे देत आहेत, ते दागिन्यांच्या शुद्धतेच्या दाव्याप्रमाणेच खरे आहेत.
ग्राहकांना काय फायदा मिळेल?
हॉलमार्क नसलेल्या दागिन्यांमध्ये भेसळ होण्याची शक्यता असते. मात्र, आता हॉलमार्क आणि HUID नंबरमुळे फसवणुकीची शक्यता खूप कमी होईल. ग्राहक सहजपणे BIS Care App वर जाऊन 'Verify HUID' या फिचरचा वापर करून दागिन्यांवर असलेला कोड खरा आहे की नाही हे तपासू शकतील. अशा प्रकारे, दागिन्यांची खरेदी अधिक सुरक्षित होईल.
वाचा - आता ATM आणि UPI द्वारे काढता येणार PF चे पैसे; EPFO 3.0 मध्ये आणखी काय बदलणार?
ज्याप्रमाणे सरकारने २०२१ मध्ये सोन्याच्या दागिन्यांवर हॉलमार्किंग अनिवार्य केले होते, त्याचप्रमाणे आता चांदीवरही हा नियम लागू केला जात आहे. यामागचा उद्देश ज्वेलरी मार्केटमध्ये अधिक पारदर्शकता आणून ग्राहकांना योग्य उत्पादन मिळेल याची खात्री करणे आहे. १ सप्टेंबरनंतर ग्राहकांकडे निवड करण्याचा पर्याय असेल, पण बहुतेक ग्राहक आता हॉलमार्क असलेल्या दागिन्यांनाच प्राधान्य देतील. यामुळे फक्त ग्राहकांचाच नाही, तर संपूर्ण ज्वेलरी उद्योगाचा फायदा होईल.