Gold Silver Price: गेल्या एक महिना सर्राफा बाजारासाठी अत्यंत चढ-उताराचा ठरला आहे. मार्चच्या सुरुवातीच्या आठवड्यात देशांतर्गत कमोडिटी बाजारात सोने आणि चांदीच्या किमती गगनाला भिडल्या होत्या, मात्र आता ग्राहकांना काहीसा दिलासा मिळाला आहे. सोने आणि चांदीच्या किमतीत झालेल्या मोठ्या घसरणीमुळे सामान्य खरेदीदार आणि गुंतवणूकदारांच्या चेहऱ्यावर समाधान पाहायला मिळत आहे.
आकडेवारीवर नजर टाकल्यास, गेल्या एका महिन्यात सोने-चांदीच्या किमतीत मोठी सुधारणा दिसून आली. मल्टी कमोडिटी एक्सचेंज (MCX) मध्ये एक महिन्यापूर्वी म्हणजेच ४ मार्च रोजी २४ कॅरेट सोन्याचा भाव सुमारे ₹१.६२ लाख प्रति १० ग्रॅम होता, जो आता घसरून ₹१.५० लाखांच्या जवळ आला आहे. अशा प्रकारे सोन्याच्या किमतीत सुमारे ₹१२ हजारांची घसरण नोंदवण्यात आली आहे.
होर्मुज संकटामुळे पाकिस्तानचं कंबरडं मोडलं; 'पेट्रोल बॉम्ब' फुटला, जनताही रस्त्यावर
दुसरीकडे, चांदीच्या बाबतीत अधिक मोठी घसरण पाहायला मिळाली आहे. ४ मार्च रोजी चांदीची किंमत सुमारे ₹२.७० लाख प्रति किलो होती, जी आता घसरून ₹२.३५ लाख झाली आहे. म्हणजेच, एका महिन्याच्या आत चांदीच्या दरात सुमारे ₹३५ हजारांची मोठी घट झाली आहे.
बाजार कोसळण्याची मुख्य कारणं
तज्ज्ञांच्या मते, या घसरणीमागे प्रामुख्यानं मध्यपूर्वेतील वाढता तणाव आणि अमेरिका-इराण यांच्यातील अनिश्चिततेमुळे बाजारात असलेली अस्थिरता कारणीभूत आहे. तसंच, गेल्या काही दिवसांतील दरवाढीनंतर गुंतवणूकदारांनी नफावसुली सुरू केली, ज्यामुळे किमतींवर दबाव निर्माण झाला. याशिवाय, जागतिक स्तरावर अमेरिकन डॉलरच्या मजबुतीमुळे सोनं आणि चांदीच्या किमती खाली येण्यास मदत झाली.
गुंतवणूकदार आणि खरेदीदारांसाठी संकेत
सर्राफा व्यापाऱ्यांच्या मते, किमतीत झालेली ही घसरण अशा लोकांसाठी एक चांगली संधी ठरू शकते जे दीर्घकाळापासून सोने-चांदीत गुंतवणूक करू इच्छित होते किंवा आगामी लग्नसराईसाठी खरेदीचं नियोजन करत होते. मात्र, बाजार अजूनही जागतिक संकेतांबाबत अत्यंत संवेदनशील आहे, त्यामुळे कोणतीही मोठी गुंतवणूक करण्यापूर्वी बाजारातील कल लक्षात घेणं महत्त्वाचं ठरेल.