EPFO Service : जर तुम्ही कर्मचारी भविष्य निर्वाह निधी संघटनेचे सदस्य असाल आणि तुमची पीएफची कामं एजंटकडून करून घेत असाल, तर ही बातमी तुमच्यासाठी अत्यंत महत्त्वाची आहे! ईपीएफओने आपल्या कोट्यवधी सदस्यांना सावध राहण्यास सांगितले आहे. ईपीएफओचे म्हणणे आहे की, तुमची सर्व कामं ऑनलाइन आणि पूर्णपणे मोफत उपलब्ध असतानाही, काही खाजगी एजंट या सेवांसाठी तुमच्याकडून मोठ्या प्रमाणात पैसे उकळत आहेत. यामुळे तुमचे आर्थिक नुकसान होत आहेच, शिवाय तुमची वैयक्तिक आणि गोपनीय माहिती देखील धोक्यात येत आहे.
एजंट्सपासून का सावध राहावे?
ईपीएफओने स्पष्टपणे सांगितले आहे की, पीएफ संबंधित कोणताही दावा दाखल करणे असो, खात्यातून पैसे काढणे असो, KYC अपडेट करणे असो किंवा तक्रार दाखल करणे असो.. या सर्व सेवा मोफत, सुरक्षित आणि घरबसल्या ईपीएफओच्या अधिकृत पोर्टल आणि उमंग ॲपवर उपलब्ध आहेत.
हे एजंट (दलाल), सायबर कॅफे किंवा फिनटेक कंपन्या फक्त ईपीएफओच्या ऑनलाइन पोर्टलचा वापर करून तुमची कामं करतात आणि त्या बदल्यात मोठी फी आकारतात. हे तुमच्या पैशांचे नुकसान तर आहेच, पण तुमचा आधार क्रमांक, बँक खात्याचा तपशील आणि ईपीएफओ खात्याची माहिती यासारखी संवेदनशील माहिती चुकीच्या हातात पडण्याचा धोकाही असतो. यामुळे तुमची गोपनीयता धोक्यात येऊ शकते.
ईपीएफओच्या सेवा झाल्या आणखी सोप्या!
- ईपीएफओने आपल्या सेवांमध्ये खूप सुधारणा केली आहे, जेणेकरून तुम्हाला कोणाचीही मदत घेण्याची गरज भासणार नाही.
- केवायसी (KYC) अपडेट : आता तुम्हाला KYC अपडेट (उदा. आधार, पॅन, बँक तपशील) करण्यासाठी नियोक्त्याच्या मंजुरीची किंवा ईपीएफओ कार्यालयात जाण्याची गरज नाही. तुम्ही आधार प्रमाणीकरणाद्वारे (Aadhaar Authentication) तुमचे प्रोफाइल सहजपणे अपडेट करू शकता.
- लाखांपर्यंतचे दावे ऑटो-सेटल: आजारपण, लग्न, घर खरेदी किंवा शिक्षणासारख्या कारणांसाठी असलेले १ लाख रुपयांपर्यंतचे आगाऊ दावे (Advance Claims) आता आपोआप निकाली निघतात. याचा अर्थ, तुम्हाला छोट्या दाव्यांसाठी कार्यालयात जाण्याची गरज नाही; पैसे थेट तुमच्या खात्यात जमा होतील. २०२४-२५ या आर्थिक वर्षात, २.३४ कोटी दावे अशा प्रकारे ऑटो-सेटल करण्यात आले आहेत.
तक्रार दाखल करणेही आता सोपे
जर तुम्हाला ईपीएफओशी संबंधित कोणतीही समस्या असेल, तर त्याचे निराकरण देखील आता खूप सोपे झाले आहे. तुम्ही तुमची तक्रार थेट CPGRAMS (केंद्रीकृत सार्वजनिक तक्रार निवारण आणि देखरेख प्रणाली) किंवा EPFiGMS (EPF एकात्मिक तक्रार व्यवस्थापन प्रणाली) पोर्टलवर नोंदवू शकता. या पोर्टलवर तक्रार दाखल करणे पूर्णपणे मोफत आहे आणि त्यांचे वेळेवर निराकरण देखील केले जाते.
कामगार मंत्रालयाच्या मते, २०२४-२५ या आर्थिक वर्षात या तक्रार निवारण प्रणालींवर १६ लाखांहून अधिक तक्रारी नोंदवण्यात आल्या होत्या आणि त्यापैकी ९८ टक्के तक्रारी निर्धारित वेळेत सोडवण्यात आल्या.
वाचा - घाईगडबडीत चुकीची कर व्यवस्था निवडली? घाबरू नका! ITR दाखल करताना 'ही' ट्रिक वापरा आणि टॅक्स वाचवा
लक्षात ठेवा, ईपीएफओच्या सर्व डिजिटल सेवा मोफत आणि सुरक्षित आहेत. कोणत्याही एजंटला पैसे देऊ नका आणि आपली गोपनीय माहिती कुणासोबतही शेअर करू नका. फक्त ईपीएफओचे अधिकृत पोर्टल किंवा उमंग ॲप वापरा आणि तुमचे काम घरबसल्या करा!