- चंद्रकांत दडस (वरिष्ठ उपसंपादक)
अब्जाधीशांची संपत्ती केवळ नशिबावर किंवा अचानक लाभलेल्या संधीवर उभी नसते; त्यामागे त्यांची निर्णयक्षमता आणि दीर्घकालीन दृष्टिकोन असतो. हा विचार आत्मसात करणे आपल्यालाही अवघड नाही, फक्त त्यासाठी शिस्त, सातत्य अन् योग्य दिशेने वाटचाल आवश्यक आहे.
आर्थिक पाया
अब्जाधीश कोणताही निर्णय घेताना ५-१० वर्षानंतरची परिस्थिती लक्षात घेतात. तत्काळ नफा दिसला नाही तरी ते संयम ठेवतात. आपणही गुंतवणूक, करिअर किंवा कौशल्य-विकास करताना दीर्घकालीन परिणामांवर लक्ष केंद्रित करावे.
समस्या शोधा, उपाय काय?
"लोकांना कोणत्या समस्या आहेत? यावर उपाय देणारी संधी कोणती?" याचा विचार अब्जाधीश करतात. त्यांची संपत्ती एखाद्या समस्येच्या नावीन्यपूर्ण तोडग्यावर उभी असते. आपणही नोकरीसोबतच स्थानिक गरजा, नवीन सेवा, कौशल्य किंवा व्यावसायिक संधी ओळखायला सुरुवात केली पाहिजे.
पैशाकडे 'साधन' म्हणून पाहा
अब्जाधीश पैशाला अंतिम ध्येय समजत नाहीत. ते 'कॅश फ्लो' आणि 'असेट्स'वर लक्ष केंद्रित करतात. आपणही खर्च कमी करून बचत आणि गुंतवणूक यास प्राधान्य द्यावे. विशेषतः म्युच्युअल फंड, एसआयपी, पीपीएफ, इंडेक्स फंड यांसारख्या दीर्घकालीन पर्यायांत गुंतवणूक करावी.
शिकण्याची अखंड तयारी
अब्जाधीश शिकणे कधीच थांबवत नाहीत. नवीन कौशल्य, बाजारातील बदल, तंत्रज्ञान हे सर्व ते सतत आत्मसात करतात. आपणही महिन्यात किमान एक नवीन कौशल्य शिकण्याची सवय लावल्यास उत्पन्नाचे स्रोत वाढतात.
भीतीऐवजी कृती
बहुतेक लोक भीतीमुळे निर्णय पुढे ढकलतात; पण, अब्जाधीश 'अपयश हे शिकण्याची संधी' मानून निर्णय घेतात.
योग्य नेटवर्क
अब्जाधीशांचे मोठे बळ म्हणजे त्यांचे नेटवर्क. आपणही आपल्या क्षेत्रातील अनुभवी लोकांशी संवाद वाढवला तर करिअर आणि व्यवसाय दोन्ही गती घेऊ शकतात.