Nirmala Sitharaman on Trump Tariffs: अमेरिकेचे राष्ट्राध्यक्ष डोनाल्ड ट्रम्प यांनी एप्रिल महिन्यात विविध देशांवर लादलेल्या टॅरिफनंतर जागतिक अर्थव्यवस्थेत मोठ्या प्रमाणावर अस्थिरता निर्माण झाली आहे. आंतरराष्ट्रीय व्यापार व्यवस्थेतील कमकुवत बाजू या निर्णयामुळे स्पष्टपणे समोर आल्या आहेत. जागतिक शेअर बाजारात मोठी घसरण, देशांमधील वाढती ट्रेड वॉर आणि परस्पर संबंधांमध्ये निर्माण झालेली दरी, हे या धोरणाचे थेट परिणाम ठरले आहेत. या पार्श्वभूमीवर केंद्रीय अर्थमंत्री निर्मला सीतारमण यांनी स्पष्ट मत मांडले आहे.
‘टॅरिफ आता हत्यार बनले’
निर्मला सीतारमण यांनी ‘टाइम्स नेटवर्क इंडिया इकॉनॉमिक कॉन्क्लेव 2025’ मध्ये बोलताना म्हटले की, आज जागतिक व्यापारात टॅरिफ आणि इतर उपाययोजना हत्यार म्हणून वापरल्या जात आहेत, ही बाब अत्यंत चिंताजनक आहे. जागतिक व्यापार आता ना पूर्णपणे मुक्त राहिला आहे, ना तो निष्पक्ष आहे, हे स्पष्ट झाले असल्याचेही त्यांनी नमूद केले.
भारताला रणनीतीने पुढे जाण्याची गरज
सीतारमण पुढे म्हणाल्या की, अशा परिस्थितीत भारताने अत्यंत विचारपूर्वक आणि रणनीतिक पद्धतीने आपली वाटचाल करणे गरजेचे आहे. केवळ टॅरिफवर चर्चा करून उपयोग होणार नाही, तर देशाची एकूण आर्थिक ताकदच भारताला जागतिक पातळीवर अतिरिक्त बळ देऊ शकते, असा त्यांनी ठाम विश्वास व्यक्त केला.
भारताने कधीही टॅरिफचा गैरवापर केला नाही
भारतावर अनेकदा अंतर्मुख असल्याचा किंवा ‘टॅरिफ किंग’ असल्याचा आरोप केला जातो, यावरही अर्थमंत्र्यांनी भाष्य केले. भारताने कधीही टॅरिफचा वापर हत्यार म्हणून केलेला नाही. देशांतर्गत उद्योगांचे संरक्षण करण्यासाठीच शुल्क लावले गेले आहेत, असे त्यांनी स्पष्ट केले. स्वस्त किंवा गरजेपेक्षा जास्त आयातीमुळे स्थानिक उद्योगांचे नुकसान होऊ नये, हा भारताच्या टॅरिफ धोरणामागचा मुख्य उद्देश असल्याचेही त्यांनी सांगितले.
टॅरिफ धोरणांवरील दुहेरी निकष?
आज काही देश उघडपणे उच्च टॅरिफ लावण्याची घोषणा करत आहेत, मात्र त्यावर फारशी टीका होत नाही, याकडेही सीतारमण यांनी लक्ष वेधले. पूर्वी अशा निर्णयांवर तीव्र टीका केली जात असे, पण आता हेच धोरण जागतिक व्यापारातील सामान्य बाब बनत असल्याचे त्यांनी नमूद केले.