TCS General AI : टाटा कन्सल्टन्सी सर्व्हिसेस (TCS) आता आर्टिफिशियल इंटेलिजन्स (AI) च्या जगात एक मोठी क्रांती घडवण्याच्या तयारीत आहे. टीसीएसचे अध्यक्ष एन. चंद्रशेखरन यांनी म्हटलं आहे की, आयटी सेवा आता पूर्णपणे स्वायत्त ऑपरेशन्स (Autonomous Operations) कडे वाटचाल करत आहे. TCS आता आपल्या कर्मचाऱ्यांसोबत आर्टिफिशियल इंटेलिजन्स म्हणजेच AI एजंट्सची एक मोठी टीम तयार करणार आहे.
टीसीएसच्या वार्षिक अहवालात भागधारकांना लिहिलेल्या पत्रात चंद्रशेखरन म्हणाले, "जनरल एआय (General AI) हे केवळ दुसरं तांत्रिक चक्र नाही, तर तो एक कामाच्या सभ्यतेतील बदल आहे." त्यांनी स्पष्ट केलं की, आयटी आणि व्यवसाय सेवा आता स्वायत्त ऑपरेशन्सकडे जात आहेत. स्वायत्त रोबोट्स आणि एआय एजंट्सचा उदय 'डार्क फॅक्टरीज' (Dark Factories) आणि एआय-आधारित एंटरप्राइझ ऑपरेशन्सचं भविष्य सुनिश्चित करतो.
TCS च्या ४ महत्त्वाच्या योजना
चंद्रशेखरन यांनी सांगितलं की, टीसीएस सध्या चार मुख्य योजनांवर काम करत आहे:
- १. आपल्या मानवी कर्मचाऱ्यांसोबत काम करणाऱ्या एआय एजंट्सचा एक मोठा संच तयार करणे.
- २. मानव आणि एआय यांच्या समन्वयाने (Human + AI Model) उपाय (Solutions) प्रदान करणे.
- ३. एआय डेटा सेंटर आणि क्लाउड पायाभूत सुविधांमध्ये मोठी गुंतवणूक करणे.
- ४. जागतिक भागीदाऱ्या (Partnerships) मजबूत करणे.
आज बहुतेक जागतिक व्यवसाय खर्च कमी करण्याचा प्रयत्न करत आहेत, असंही ते म्हणाले. या बदलांमध्ये पुरवठा साखळीत (Supply Chain) शेवटपर्यंतची पारदर्शकता (End-to-end Traceability) आणणे, लवचिकता निर्माण करण्यासाठी सोर्सिंग धोरणांमध्ये विविधता आणणे आणि वेगवेगळ्या बाजारपेठांना सेवा देण्यासाठी प्रदेश-विशिष्ट इकोसिस्टम विकसित करणे यांचा समावेश आहे.
वाचा - गुंतवणूकदारांसाठी 'सुवर्णसंधी'? स्कोडा ट्यूब्सचा IPO आजपासून सुरू, लिस्टिंगलाच 'बंपर' फायदा?
TCS ने नवा टप्पा गाठला
आर्थिक वर्ष २०२५ मध्ये टीसीएसने ३० अब्ज डॉलर्सचा महसूल आणि*२० अब्ज डॉलर्सची ब्रँड व्हॅल्यू (Brand Value) यासारखे मोठे टप्पे पार केले आहेत. टीसीएसचे एमडी आणि सीईओ के. कृतिवासन यांनी म्हटलं आहे की, कंपनी नवीन तंत्रज्ञान आणि व्यवसाय मॉडेल्सचा शोध घेण्यावर लक्ष केंद्रित करेल आणि आयटी सेवा उद्योगात नवीन बेंचमार्क स्थापित करण्यासाठी सज्ज आहे. यावरून हे स्पष्ट होतं की, टीसीएस भविष्यातील तंत्रज्ञानामध्ये, विशेषतः एआय क्षेत्रात, मोठी भूमिका बजावण्यासाठी सज्ज झाली आहे.