Tata Motors Shares : गेल्या आठवड्यात टाटा समूहाची मालकी असलेल्या एअर इंडियाच्या विमानाला अहमदाबाद येथे अपघात झाला. याचा परिणाम शेअर बाजारावरही पाहायला मिळाला. टाटा ग्रुपच्या जवळपास सर्व कंपन्यांचे शेअर्समध्ये घसरण झाली. यानंतर आज टाटा मोटर्सला मोठा धक्का बसला आहे. ट्रक, कार आणि इलेक्ट्रिक वाहनांच्या बाजारात दमदार कामगिरी करणाऱ्या टाटा मोटर्सच्या शेअर्समध्ये आज मोठी घसरण दिसून आली. राष्ट्रीय शेअर बाजारावर (NSE) त्यांच्या शेअर्सची किंमत ४.८६% ने घसरून ६७७.४५ वर आली. या घसरणीमागे नेमकं काय कारण आहे? कंपनीची आर्थिक स्थिती बिघडली आहे की बाजारात नकारात्मक वातावरण आहे? चला सविस्तर समजून घेऊया.
JLR च्या चिंतेमुळे टाटा मोटर्सला फटका
टाटा मोटर्सच्या शेअरमध्ये घसरण होण्यामागचं सर्वात मोठं कारण म्हणजे त्यांची ब्रिटिश लक्झरी कार युनिट जग्वार लँड रोव्हर (JLR) ने नुकतेच सादर केलेले गुंतवणूकदार सादरीकरण. या सादरीकरणात, JLR ने कमकुवत मुक्त रोख प्रवाह (Free Cash Flow) आणि अनेक मोठ्या जागतिक जोखमींची शक्यता व्यक्त केली आहे. कंपनी त्यांच्या गुंतवणूक योजनांना कटिबद्ध असली तरी, आणि ५-७ टक्के EBIT मार्जिन (नफ्याचे प्रमाण) राखण्याचा प्रयत्न करत असली तरी, आर्थिक वर्ष २०२६ मध्ये त्यांचा मुक्त रोख प्रवाह "शून्य जवळ" राहण्याची शक्यता JLR ने वर्तवली आहे. याचा अर्थ, कंपनीकडे रोख रक्कम कमी प्रमाणात उपलब्ध असेल, ज्यामुळे गुंतवणूकदार चिंतेत पडले आहेत.
JLR समोरील मोठी आव्हाने
JLR ने आपल्या सादरीकरणात अनेक अडचणी अधोरेखित केल्या, ज्या कंपनीसाठी डोकेदुखी ठरू शकतात.
- सेमीकंडक्टरची कमतरता : ही ऑटोमोबाईल उद्योगात आधीपासूनच एक मोठी समस्या आहे, ज्यामुळे उत्पादन थांबले आहे.
- अॅल्युमिनियम पुरवठ्यात अडथळा : पुरवठा करणाऱ्या कंपन्यांना पुराचा फटका बसल्याने अॅल्युमिनियमच्या पुरवठा साखळीत (Supply Chain) व्यत्यय येत आहे.
- ब्रिटनमधील चोऱ्या : ब्रिटनमध्ये वाढत्या चोऱ्यांच्या घटनांमुळेही JLR साठी चिंता वाढली आहे, कारण यामुळे उत्पादन आणि वितरणावर परिणाम होऊ शकतो.
भविष्यातील काही मोठ्या आव्हानांचाही उल्लेख
- अमेरिकेतील आयात शुल्क : अमेरिकेने ब्रिटन आणि स्लोवाकियातून येणाऱ्या वाहनांवर २७.५ टक्के शुल्क (टॅरिफ) लावले आहे. यामुळे जेएलआरला अमेरिकेतील शिपमेंट तात्पुरती थांबवावी लागली असून ते आता त्यांच्या किंमत धोरणाचा पुनर्विचार करत आहेत. तसेच, जेएलआर अशा बाजारपेठांमध्ये वाहनांचे पुनर्वाटप करत आहे, जिथे नफा वाढवता येईल.
- चीनमधील बाजाराचा दबाव : जगातील सर्वात मोठी ऑटो बाजारपेठ असलेल्या चीनमधील प्रीमियम कार विभागात जेएलआरला मोठा दबावाचा सामना करावा लागत आहे. आर्थिक वर्ष २०२५ मध्ये प्रीमियम कार बाजारपेठ १५ टक्क्यांनी घसरण्याची शक्यता कंपनीने व्यक्त केली आहे, ज्यामागे नवीन कर्जाचा अभाव आणि डीलरशिप बंद होणे ही कारणे आहेत.
वाचा - इराण-इस्रायल संघर्षामुळे पाकिस्तानवर रडण्याची वेळ! पेट्रोल-डिझेलचे भाव भडकले, काय आहेत दर?
टाटा मोटर्सची आर्थिक कामगिरी
टाटा मोटर्सची आर्थिक स्थितीही फारशी चांगली नव्हती. मार्च २०२५ मध्ये संपलेल्या चौथ्या तिमाहीत कंपनीचा एकत्रित निव्वळ नफा ५१ टक्क्यांनी घसरून ८,४७० कोटी झाला, जो मागील वर्षी याच तिमाहीत १७,४०७ कोटी होता. मात्र, कंपनीचा एकूण ऑपरेशनल महसूल ०.४ टक्क्यांनी वाढून १,१९,५०३ कोटींवर पोहोचला. तरीही, हा आकडा बाजाराच्या अपेक्षेपेक्षा कमी होता, ज्यामुळे गुंतवणूकदारांची चिंता वाढली.