Stock Markets Today: शेअर बाजारात आज देशांतर्गत फंडांच्या सततच्या खरेदीमुळे काही सकारात्मक संकेत दिसत आहेत, परंतु आजची सुरुवात मात्र थोडी सुस्त झाली. सेन्सेक्स आणि निफ्टी किरकोळ वाढीसह उघडले, पण नंतर त्यात चढ-उतार दिसून आले. दरम्यान सकाळी ९:३१ वाजता सेन्सेक्स ९७ अंकांच्या वाढीसह ७४,६६१ वर व्यवहार करत होता, तर निफ्टी ४९ अंकांनी वधारून २३,२०० च्या जवळ पोहोचला होता. बँक निफ्टीमध्ये १७६ अंकांची वाढ होती आणि India VIX ४ टक्क्यांनी वर होता. कामकाजाच्या सुरुवातीला त्यात आणखी वाढ दिसून आली.
विविध क्षेत्रांतील स्थिती
आज ऑटो, NBFC आणि FMCG क्षेत्रांत तेजी दिसून आली. मेटल, सार्वजनिक क्षेत्रातील बँका (PSU Bank) आणि खासगी बँकांचे निर्देशांकही वाढले होते. मात्र, दुसरीकडे रियल्टी निर्देशांक १.३ टक्क्यांनी घसरला होता. तसेच आयटी, ऑइल अँड गॅस, मीडिया, फार्मा आणि हेल्थकेअर क्षेत्रांत मोठी घसरण पाहायला मिळाली. सुरुवातीच्या सत्रात सेन्सेक्स २७० अंकांनी वधारून ७४,८४१ वर, तर निफ्टी ८० अंकांनी वधारून २३,२३४ च्या आसपास होता, परंतु तिथून बाजार पुन्हा घसरला.
मध्य आशियातील तणाव वाढला, ट्रम्प यांची नवी धमकी
अमेरिकेचे माजी अध्यक्ष डोनाल्ड ट्रम्प यांनी इराणच्या खर्ग बेटावरील तेल निर्यात केंद्रावर हल्ले वाढवण्याची धमकी दिली आहे. ट्रम्प यांनी म्हटले की, ते "केवळ गंमत म्हणूनही हल्ले करू शकतात". दुसरीकडे इराणनेही प्रत्युत्तर देत इस्रायल आणि युएईमधील अनेक अमेरिकन तळांवर ड्रोन आणि क्षेपणास्त्रांनी हल्ले केलेत. यामुळे मध्य आशियातील तणाव अधिकच वाढला आहे.
कच्चं तेल १०३ डॉलर्सच्या पार
गेल्या १७ दिवसांपासून सुरू असलेल्या या संघर्षामुळे कच्च्या तेलाच्या किमतीत सलग तिसऱ्या दिवशी वाढ झाली असून किमती १०३ डॉलरच्या वर राहिल्या आहेत. इराणनं एक निवेदन जारी करत 'स्ट्रेट ऑफ हॉर्मुझ' मित्र देशांसाठी उघडा राहील, तर शत्रू देशांसाठी तो बंद ठेवला जाणार असल्याचं म्हटलं. या निवेदनामुळे जागतिक पुरवठ्याबाबत अनिश्चितता निर्माण झाली आहे.
भारताची LPG जहाजे सुरक्षित, पण धोका कायम
वाढत्या तणावादरम्यान एक दिलासादायक बातमी म्हणजे स्ट्रेट ऑफ हॉर्मुझमधून LPG ने भरलेली भारताची दोन जहाजे सुरक्षितपणे बाहेर पडली असून ती आज किंवा उद्यापर्यंत गुजरातला पोहोचू शकतात. तरीही भारताची सुमारे २२ जहाजं अजूनही स्ट्रेट ऑफ हॉर्मुझ परिसरात आहेत, ज्यामुळे पुरवठ्याबाबतची चिंता अजूनही कायम आहे.