मुंबई: अमेरिका-इस्रायल विरुद्ध इराण युद्ध सुरू झाल्यापासून मार्च महिन्यात शेअर बाजारातही युद्धाचा प्रलय आला असून, एकाच महिन्यात गुंतवणूकदारांचे ५२ लाख कोटींचे नुकसान झाले आहे. दुसरीकडे रुपयाही महानीचांकी पातळीवर पोहोचला आहे. एका डॉलरसाठी ९४.७० रुपये मोजावे लागणार असल्याने येत्या काळात देशात महागाईचा आगडोंब होऊ शकतो.
सोमवारी सेन्सेक्स १,६३५ अंकांनी कोसळून ७१,९४७.५५ वर बंद झाला. बाजारातील घसरणीचा मोठा परिणाम जागतिक पातळीवर दिसू लागला असून, जगातील एकूण बाजारमूल्यातील भारताचा हिस्सा चार वर्षात प्रथमच ३ टक्क्यांच्या खाली घसरला. ३० मार्च २०२६ रोजी हा हिस्सा २.९८ टक्क्यांवर आला असून, २०२४ मधील शिखर पातळीवरून मोठी घसरण नोंदवली गेली आहे. यामुळे गुंतवणूकदारांचे पोर्टफोलिओ लालेलाल झाले आहेत.
घसरणीमागील प्रमुख कारणे
पश्चिम आशियातील युद्धाचा भडका वाढला. कच्च्या तेलाचे दर ११५ डॉलर प्रतिबॅरलवर, परदेशी संस्थात्मक गुंतवणूकदारांची मोठ्या प्रमाणावर विक्री जागतिक बाजारातील नकारात्मक संकेत.
डॉलरसमोर रुपयाचे लोटांगण
इराण युद्धामुळे, रुपयाने सोमवारी अमेरिकन डॉलरच्या तुलनेत प्रथमच २५ चा टप्पा ओलांडला. व्यवहारादरम्यान तो घसरून ९५.२२च्या नीचांकी पातळीवर पोहोचला होता. मात्र, नंतर त्यात किंचित सुधारणा झाली आणि व्यवहाराच्या अखेरीस तो ९४.७८ वर बंद झाला. रुपयात १४ वर्षांतील सर्वात मोठी घसरण झाली आहे.
चांदीत ७ हजार रुपयांची वाढ होऊन दर २.३७ लाख रुपये प्रतिकिलोवर पोहोचले, सोन्याचा भाव ३,७०० रुपयांनी वाढत १.५१ लाख रुपये प्रति १० ग्रॅमवर गेला.