Share Market Crash : भारतीय शेअर बाजारासाठी गुरुवारचा दिवस 'अमंगळ' ठरला. जागतिक बाजारातील नकारात्मक संकेत आणि कच्च्या तेलाच्या किमतीत झालेल्या भडक्यामुळे गुंतवणूकदारांमध्ये भीतीचे वातावरण पसरले. परिणामी, चौफेर विक्रीचा मारा झाल्याने मुंबई शेअर बाजाराचा निर्देशांक 'सेन्सेक्स' सुमारे २,५०० अंकांनी कोसळला. गेल्या २१ महिन्यांतील ही निफ्टीची सर्वात मोठी एकदिवसीय घसरण मानली जात आहे.
बाजारातील पडझडीची भीषणता
- बीएसई सेन्सेक्स : २,४९६.८९ अंकांनी (३.२६%) कोसळून ७४,२०७.२४ वर स्थिरावला.
- एनएससी निफ्टी : ७७५.६५ अंकांच्या घसरणीसह २३,००२.१५ च्या पातळीवर आला.
- गुंतवणूकदारांना मोठा फटका : बीएसईमध्ये नोंदणीकृत कंपन्यांचे एकूण बाजार भांडवल ४३९ लाख कोटींवरून घटून ४२७.३८ लाख कोटी रुपयांवर आले. म्हणजेच अवघ्या काही तासांत गुंतवणूकदारांची सुमारे ११.६२ लाख कोटी रुपयांची संपत्ती धुळीस मिळाली.
घसरणीची प्रमुख कारणे
- कच्च्या तेलाचा भडका : मध्य आशियातील ऊर्जा प्रकल्पांवर होणाऱ्या हल्ल्यांमुळे पुरवठ्याची साखळी विस्कळीत झाली आहे. ब्रेंट क्रूड १२० डॉलर प्रति बॅरलच्या उंबरठ्यावर पोहोचल्याने महागाई वाढण्याची भीती निर्माण झाली आहे.
- एचडीएफसी बँकेचा दबाव : बँकिंग आणि फायनान्शिअल सेक्टरमध्ये ३ टक्क्यांहून अधिक घसरण झाली. यात 'एचडीएफसी बँके'च्या शेअर्समधील मोठ्या विक्रीने संपूर्ण बँकिंग निर्देशांकाला खाली खेचले.
- जागतिक संकेत : परकीय संस्थागत गुंतवणूकदारांनी केलेली विक्री आणि पाश्चात्य देशांतील बाजारातील कमजोरीचा थेट परिणाम भारतावर झाला.
सेक्टरनिहाय आणि शेअरनिहाय स्थिती
आजच्या सत्रात निफ्टीचे सर्व १६ सेक्टोरल इंडेक्स लाल निशाणात बंद झाले. सेन्सेक्समधील सर्वच्या सर्व ३० शेअर्स घसरणीसह बंद झाले, जे बाजारातील घबराट स्पष्ट करतात.
- टॉप लूजर्स : इटरनल (५.६५% घसरण), बजाज फायनान्स, एचडीएफसी बँक, महिंद्रा अँड महिंद्रा आणि एल अँड टी (४.७% ते ५.४% घसरण).
- अॅडव्हान्स-डिक्लाईन रेशो : एकूण ४,४०४ शेअर्समध्ये व्यवहार झाला, त्यापैकी ३,१७४ शेअर्स घसरले, तर केवळ १,०७० शेअर्स वाढू शकले. तब्बल ३६८ शेअर्सनी ५२ आठवड्यांचा नीचांकी स्तर गाठला.
वाचा - सरकारी कर्मचाऱ्यांना गुड न्यूज! महागाई भत्ता ६० टक्क्यांवर जाण्याची शक्यता; 'एरिअर्स'सह मिळणार पगारवाढ
गेल्या तीन दिवसांपासून सुरू असलेल्या तेजीला आजच्या महाप्रलयाने ब्रेक लावला आहे. निफ्टीने २३,००० ची महत्त्वाची पातळी कशीबशी टिकवून धरली आहे. जर कच्च्या तेलाच्या किमतीत घट झाली नाही, तर उद्याही बाजारात 'मंदी'चे सावट राहू शकते. किरकोळ गुंतवणूकदारांनी अशा परिस्थितीत घाबरून जाऊन विक्री करण्याऐवजी दर्जेदार शेअर्समध्ये संयम बाळगणे आवश्यक आहे.