Stock market Updates : भारतीय शेअर बाजाराची स्थिती दिवसेंदिवस गुंतवणूकदारांची चिंता वाढवत आहे. मंगळवारी देखील दिवसभर अस्थिरतेचे वातावरण कायम राहिले. विदेशी गुंतवणूकदारांनी बाजाराकडे पाठ फिरवल्याने आणि अमेरिकेच्या शुल्क धोरणांबाबतच्या वाढत्या चिंतांमुळे गुंतवणूकदार दबावखाली होते. परिणामी, सेन्सेक्स आणि निफ्टी सलग आठव्या दिवशी घसरणीसह बंद झाले.
मात्र, आठ सत्रांच्या नकारात्मकतेनंतरही दोन्ही प्रमुख निर्देशांकांनी महिनाअखेरीस किरकोळ वाढीसह आपली स्थिती सावरली, ज्यामुळे बाजारातील दोन महिन्यांच्या तोट्याची मालिका खंडित झाली.
सेन्सेक्स-निफ्टीची स्थिती
बाजारातील चढ-उतारांदरम्यान प्रमुख निर्देशांकांनी हलक्या नुकसानीसह व्यवहार थांबवला.
बीएसई सेन्सेक्स : ९७ अंकांनी घसरून ८०,२६७.६२ वर बंद झाला.
निफ्टी : २४ अंकांनी घसरून २४,६११.१० या पातळीवर स्थिरावला.
बीएसई मिडकॅप आणि स्मॉलकॅप निर्देशांक मात्र दिवसभर जवळपास स्थिर राहिले. एकूण बाजार भांडवल मागील सत्राप्रमाणे ४५१.८ लाख कोटी रुपयांवर कायम राहिले.
दिलासादायक बाब म्हणजे सलग आठ सत्रांमध्ये सेन्सेक्स ३.३१% आणि निफ्टी ३.२०% ने खाली आले असले तरी, सप्टेंबर महिना संपताना दोन्ही निर्देशांकांनी अर्ध्या टक्क्याहून अधिक वाढीसह सकारात्मक समाप्ती केली, ज्यामुळे दोन महिन्यांची घसरण थांबली.
बाजारातील अस्थिरतेची कारणे
शेअर बाजारातील तज्ज्ञांच्या मते, बाजार सतत दबावाखाली राहण्याची मुख्य कारणे खालीलप्रमाणे आहेत.
विदेशी निधीची विक्री: परदेशी गुंतवणूकदार सातत्याने भारतीय बाजारातून पैसे काढून घेत आहेत.
जागतिक चिंता: अमेरिकेच्या शुल्क धोरणांमुळे जागतिक व्यापार आणि आर्थिक वाढीवर होणाऱ्या परिणामांबद्दल चिंता कायम आहे.
RBI धोरणापूर्वी सावधगिरी: भारतीय रिझर्व्ह बँकेच्या आगामी मौद्रिक धोरण समितीच्या बैठकीपूर्वी गुंतवणूकदार सावध भूमिकेत आहेत. सध्याची आर्थिक वाढ आणि चलनवाढीची स्थिती पाहता, आरबीआय रेपो दर स्थिर ठेवेल अशी बाजारात अपेक्षा आहे.
वाचा - GST कपातीनंतर आता EMI चा भारही हलका होणार; कर्जाचे ३ नियम १ ऑक्टोबरपासून लागू
सर्वाधिक वाढ आणि नुकसान झालेले शेअर्स
आज निफ्टी ५० निर्देशांकातील २८ कंपन्यांच्या शेअर्समध्ये वाढ झाली.
| सर्वाधिक तेजी | सर्वाधिक घसरण |
| अदानी पोर्ट्स : १.६६% | इंटरग्लोब एविएशन : २.०३% |
| अल्ट्राटेक सिमेंट : १.६५% | | आयटीसी (ITC): १.३६% |
| जेएसडब्ल्यू स्टील : १.६१% | बजाज फिनसर्व्ह : १.१७% |
बाजारातील ही अस्थिरता आणि सलगची घसरण, आरबीआयच्या पतधोरण निर्णयावर अवलंबून असेल, असे तज्ञांचे मत आहे.