GST Collection March 2026: एकीकडे जागतिक स्तरावर आर्थिक अनिश्चिततेचे वारे फिरत आहेत, तर दुसरीकडे भारतासाठी दिलासादायक बातमी समोर आली आहे. मार्च २०२६ मध्ये वस्तू आणि सेवा कर (GST) संकलनात ९ टक्क्यांची वाढ नोंदवली गेली आहे. यासह मासिक जीएसटी संकलनाने २ लाख कोटी रुपयांचा ऐतिहासिक टप्पा ओलांडला आहे. विशेष म्हणजे, आर्थिक वर्ष २०२५-२६ मध्ये तिसऱ्यांदा जीएसटी संकलनाने हा टप्पा पार केला आहे.
मार्चमध्ये ₹२.०० लाख कोटींपेक्षा जास्त संकलन
ताज्या आकडेवारीनुसार मार्च २०२६ मध्ये एकूण जीएसटी संकलन ₹२,००,३४४ कोटी इतके झाले. या वाढीत आयातीमधून मिळालेल्या महसुलाचा मोठा वाटा आहे. आयातीतून मिळणारा महसूल १७.८ टक्क्यांनी वाढून ₹५५,८६१ कोटी झाला. तर देशांतर्गत व्यवहारातून मिळणारा महसूल ५.९ टक्क्यांनी वाढून १.४६ लाख कोटी रुपयांहून अधिक झाला आहे.
कर कपातीनंतरही महसूल वाढ
सप्टेंबर २०२५ मध्ये सरकारने जीएसटी दरांमध्ये मोठे बदल केले होते. सुमारे ३७५ वस्तूंवरील कर कमी करण्यात आला आणि कर रचना सोपी करून प्रामुख्याने ५% आणि १८% अशा दोन मुख्य कर स्लॅबमध्ये मर्यादित करण्यात आली. सुरुवातीला नोव्हेंबरमध्ये महसूल घटून १.७० लाख कोटी रुपये झाला होता, मात्र त्यानंतर महसूलात सातत्याने वाढ होत असल्याचे दिसत आहे.
संपूर्ण वर्षाचा आढावा
आर्थिक वर्ष २०२५-२६ हे जीएसटी महसूलाच्या दृष्टीने ऐतिहासिक ठरले आहे. संपूर्ण वर्षभरात एकूण जीएसटी महसूल ८.३ टक्के वाढीसह २२.२७ लाख कोटी रुपयांपेक्षा जास्त झाला. एप्रिल २०२५ मध्ये आतापर्यंतचा सर्वाधिक ₹२.३६ लाख कोटींचा जीएसटी संकलनाचा विक्रम नोंदवला गेला होता.
जीएसटी संकलनात महाराष्ट्र अव्वल
राज्यनिहाय जीएसटी संकलनात महाराष्ट्राचा सर्वाधिक वाटा असून सुमारे ०.१३ लाख कोटी रुपये संकलित झाले. याशिवाय कर्नाटक आणि गुजरात या राज्यांकडूनही मोठ्या प्रमाणात जीएसटी महसूल मिळाला. मार्च २०२६ दरम्यान आंध्र प्रदेशमध्ये नेट जीएसटी संकलनात १० टक्क्यांची वाढ नोंदवली गेली आहे.
तज्ज्ञांच्या मते, कर दर कमी करून आणि कर रचना सोपी करूनही जीएसटी महसूल २ लाख कोटी रुपयांच्या पुढे जाणे हे भारतीय अर्थव्यवस्थेच्या मजबुतीचे आणि कर अनुपालन सुधारल्याचे लक्षण आहे. आयातीत झालेली मोठी वाढ औद्योगिक आणि व्यापारिक हालचाली वाढत असल्याचे दर्शवते, तर देशांतर्गत विक्रीतील स्थिर वाढ ग्राहकांचा आत्मविश्वास दर्शवते.