Gold Silver Rate 10 Feb On MCX: दोन दिवसांच्या वाढीनंतर सोन्याच्या दरात घसरण नोंदवण्यात आली आहे, कारण अस्थिर बाजारपेठेत गुंतवणूकदारांनी नफा वसुली करण्यावर भर दिल्याचं समोर आलंय. मंगळवारी सकाळी देशांतर्गत वायदा बाजारात सोने आणि चांदीच्या किमतीत घट दिसून आली. एमसीएक्सवर (MCX) एप्रिल महिन्यासाठीचे सोन्याचे वायदा दर १.६ टक्क्यांनी म्हणजेच सुमारे २,५०० रुपयांनी घसरून १,५५,५४६ रुपये प्रति १० ग्रॅमवर आले. त्याचप्रमाणे चांदीचा वायदा दर ४ टक्क्यांहून अधिक म्हणजेच ११,००० रुपयांहून जास्त घसरून २,५१,५४४ रुपये प्रति किलोवर पोहोचला आहे.
आंतरराष्ट्रीय बाजारपेठेतील स्थिती
आंतरराष्ट्रीय बाजारपेठेत सोन्याच्या किमती सुरुवातीच्या व्यवहारात १.४ टक्क्यांपर्यंत घसरल्या आणि काही काळासाठी त्या ५,००० डॉलर प्रति औंसच्या खाली गेल्या होत्या, मात्र नंतर या नुकसानीची काही प्रमाणात भरपाई झाली. २९ जानेवारी रोजी सोन्यानं आपला विक्रमी उच्चांक गाठला होता, तेव्हापासून सोन्याच्या दरात आतापर्यंत सुमारे १० टक्क्यांची घसरण झाली आहे, तरीही या वर्षी सोनं मजबुतीनं वरच्या पातळीवर आहे. सिंगापूरमध्ये सकाळी ८:०० वाजेपर्यंत स्पॉट गोल्ड ०.५ टक्क्यांनी घसरून ५,०३२.५३ डॉलर प्रति औंसवर पोहोचले, तर चांदी १.८ टक्क्यांनी घसरून ८१.९२ डॉलरवर आली. प्लॅटिनम आणि पॅलेडियमच्या किमतीतही घसरण दिसून आली.
युपीआयद्वारे काढता येणार पीएफची रक्कम, कशी आणि कधी; जाणून घ्या
घसरणीची प्रमुख कारणं
सोन्या-चांदीच्या दरात घसरण होण्यामागे अमेरिकन डॉलर इंडेक्समधील वाढ हे एक मुख्य कारण आहे. हा इंडेक्स ९६.८२ वरून वाढून ९७.०१ वर पोहोचला आहे, ज्यामुळे परदेशी खरेदीदारांसाठी डॉलर-आधारित सोनं महाग झालं. याव्यतिरिक्त, या आठवड्यात जाहीर होणाऱ्या अमेरिकेतील रोजगार आणि महागाईच्या महत्त्वाच्या आकडेवारीपूर्वी गुंतवणूकदारांनी सावध भूमिका घेतली आहे. या आकडेवारीवरून भविष्यातील व्याजदरांच्या संदर्भात संकेत मिळण्याची अपेक्षा आहे.
बाजाराची पुढची दिशा
जानेवारीच्या अखेरीस मौल्यवान धातूंमध्ये मोठी घसरण झाली होती. मात्र, दीर्घकालीन तेजीसाठी कारणीभूत असलेले घटक, जस की वाढलेले भू-राजकीय धोके, मध्यवर्ती बँकांकडून होणारी खरेदी आणि सरकारी रोखे व चलनांमधून गुंतवणूकदारांचं बाहेर पडणं, हे अद्यापही प्रभावी आहेत. ब्लूमबर्गच्या मते, डॉयचे बँक एजी आणि गोल्डमॅन सॅक्स ग्रुप इंक सारख्या अनेक बँकांनी आणि मालमत्ता व्यवस्थापकांनी बुलियनच्या पुनरागमनाला पाठिंबा दिला आहे. जानेवारीमध्ये चीनच्या मध्यवर्ती बँकेनं आपली सोन्याची खरेदी सलग १५ व्या महिन्यापर्यंत वाढवली आहे, जे अधिकृत मागणीची मजबुती दर्शवते.