Indian Bank FD Scheme: नवीन वर्षाच्या सुरुवातीसोबतच गुंतवणूकदारांनी नवीन गुंतवणुकीलाही सुरुवात केली आहे. आज आम्ही तुम्हाला इंडियन बँकेच्या अशा एका एफडी (Fixed Deposit) योजनेबद्दल सांगणार आहोत, ज्यामध्ये १,००,००० रुपये जमा करून २२,४२० रुपयांपर्यंत निश्चित व्याज मिळवता येतं. विशेष म्हणजे, आरबीआयनं (RBI) वर्ष २०२५ मध्ये रेपो रेटमध्ये एकूण १.२५ टक्क्यांची कपात केली होती, ज्यामुळे एकीकडे कर्जाचे व्याजदर कमी झाले, तर दुसरीकडे एफडीवरील व्याजही घटलं. असं असूनही, एफडीवर अजूनही चांगलं व्याज मिळत आहे.
एफडी खात्यांवर ७.२० टक्क्यांपर्यंत व्याज देतेय इंडियन बँक
सार्वजनिक क्षेत्रातील इंडियन बँक आपल्या ग्राहकांना एफडीवर आकर्षक व्याज देऊ करत आहे. इंडियन बँकेत ७ दिवसांपासून ते १० वर्षांपर्यंतची एफडी करता येते. ही सरकारी बँक आपल्या ग्राहकांना एफडी खात्यांवर २.८० टक्क्यांपासून ते ७.२० टक्क्यांपर्यंत व्याज देत आहे. इंडियन बँक आपल्या ४४४ दिवसांच्या विशेष एफडी योजनेवर सर्वाधिक व्याज देत आहे. ही बँक ४४४ दिवसांच्या एफडीवर सामान्य ग्राहकांना ६.४५ टक्के, ज्येष्ठ नागरिकांना ६.९५ टक्के आणि अति-ज्येष्ठ नागरिकांना ७.२० टक्के व्याज देऊ करत आहे.
१ लाख रुपये जमा केल्यावर मिळणार २२,४२० रुपयांपर्यंत व्याज
इंडियन बँक ३ वर्षांच्या एफडी योजनेवर सामान्य ग्राहकांना ६.०५ टक्के, ज्येष्ठ नागरिकांना ६.५५ टक्के आणि अति-ज्येष्ठ नागरिकांना ६.८० टक्के व्याज देत आहे.
सामान्य नागरिक: जर तुम्ही ३ वर्षांच्या योजनेत १,००,००० रुपये जमा केले, तर मॅच्युरिटीवर एकूण १,१९,७३९ रुपये मिळतील. यामध्ये १९,७३९ रुपयांचे निश्चित व्याज समाविष्ट आहे.
ज्येष्ठ नागरिक: जर तुम्ही ज्येष्ठ नागरिक असाल आणि ३ वर्षांच्या एफडीमध्ये १ लाख रुपये जमा केले, तर मॅच्युरिटीवर एकूण १,२१,५२० रुपये मिळतील, ज्यामध्ये २१,५२० रुपयांचे निश्चित व्याज असेल.
अति-ज्येष्ठ नागरिक: जर तुम्ही अति-ज्येष्ठ नागरिक असाल, तर तुम्हाला मॅच्युरिटीवर एकूण १,२२,४२० रुपये मिळतील, ज्यामध्ये २२,४२० रुपयांच्या निश्चित व्याजाचा समावेश आहे.