Stock Market : आज रविवारी, १ फेब्रुवारी रोजी संपूर्ण देशाचे लक्ष लागून असलेल्या 'केंद्रीय अर्थसंकल्प २०२६-२७' च्या दिवशी शेअर बाजाराची सुरुवात काहीशी संथ आणि अस्थिर झाली. सुट्टीच्या दिवशीही विशेष सत्र सुरू असताना, बाजार सुरुवातीला हिरव्या निशाणीत उघडला खरा, पण अवघ्या काही मिनिटांतच गुंतवणूकदारांनी सावध पवित्रा घेतल्याने दोन्ही प्रमुख निर्देशांकांनी लाल निशाणीत धाव घेतली.
तेजीकडून घसरणीकडे
सकाळी ९:१५ वाजता बाजार उघडला तेव्हा सेन्सेक्स आणि निफ्टीमध्ये किरकोळ वाढ दिसून आली.
सेन्सेक्स: ११९.१९ अंकांच्या (०.१४%) वाढीसह ८२,३८८.९७ वर ओपन झाला.
निफ्टी: १३.१० अंकांच्या (०.०५%) वाढीसह २५,३३३.७५ वर ओपन झाला.
मात्र, अवघ्या १५ मिनिटांतच ही तेजी ओसरली. सकाळी ९:२१ वाजेपर्यंत सेन्सेक्स १५ अंकांनी घसरून ८२,२८५ वर, तर निफ्टी ३८ अंकांच्या घसरणीसह २५,२८२ च्या पातळीवर व्यवहार करत होता. अर्थमंत्र्यांच्या भाषणापूर्वी गुंतवणूकदार 'वेट अँड वॉच'च्या भूमिकेत असल्याचे यातून स्पष्ट होत आहे.
आजच्या सत्रातील सुरुवातीचे 'हिरो' आणि 'झिरो'
बीएसईवरील टॉप गेनर्स
सन फार्मा, ॲक्सिस बँक, पॉवरग्रिड आणि एचडीएफसी बँक हे शेअर्स सुरुवातीला वधारले होते.
बीएसईवरील टॉप लूजर्स
टाटा स्टील, एटरनल, टेक महिंद्रा आणि बजाज फिनसर्व्ह या शेअर्समध्ये विक्रीचा दबाव दिसून आला.
वाचा - आधी पडझड, मग जोरदार उसळी! यंदाही शेअर बाजारात असाच 'हाय व्होल्टेज' ड्रामा रंगणार?
शुक्रवारच्या घसरणीचे सावट कायम?
गेल्या शुक्रवारीही (३० जानेवारी) बाजारात नकारात्मक वातावरण होते. सेन्सेक्स २९६ अंकांनी, तर निफ्टी ९८ अंकांनी घसरून बंद झाला होता. शुक्रवारी टाटा स्टील आणि आयसीआयसीआय बँक यांसारख्या मोठ्या शेअर्सनी बाजाराला खाली खेचले होते. आज बजेटमध्ये पायाभूत सुविधा आणि करांबाबत होणाऱ्या घोषणांवरच बाजाराची पुढील दिशा अवलंबून असेल.