तुमचे पैसे बँक खात्यात, जुन्या शेअर्समध्ये, लाभांशात किंवा विमा पॉलिसीमध्ये अडकले आहेत आणि तुम्ही ते विसरला आहात का? पण आता ते परत मिळवणं सोपं होणार आहे. अर्थ मंत्रालय आणि रिझर्व्ह बँक ऑफ इंडिया (RBI) संयुक्तपणे एक एकत्रित पोर्टल विकसित करत आहेत जे बचतकर्त्यांना आणि लहान गुंतवणूकदारांना त्यांच्या पैशांवर सहजपणे दावा करण्यास मदत करतील.
गुरुवारी, वित्तीय सेवा विभागाचे (DFS) सचिव एम. नागराजू यांनी घोषणा केली की हे एकच पोर्टल बँक ठेवी, पेन्शन फंड, शेअर्स आणि लाभांश अशा विविध ठिकाणी ठेवलेल्या पैशांचा मागोवा घेण्यास मदत करेल. त्यांनी एका कार्यक्रमात सांगितलं की हे पोर्टल लवकरच सुरू होण्याची अपेक्षा आहे. संपूर्ण प्रक्रियेचे निरीक्षण RBI करेल.
सध्याची व्यवस्था काय?
सध्या, वेगवेगळ्या ठिकाणी अडकलेल्या पैशांचा मागोवा घेण्यासाठी वेगवेगळे पोर्टल आहेत. आरबीआयचे यूडीजीएएम पोर्टल बँकांमध्ये जमा असलेल्या आणि दावा न केलेल्या रकमेसाठी आहे. सेबीचे MITRA पोर्टल शेअर बाजाराशी संबंधित बाबींसाठी आहे. आयआरडीएआयचे 'बिमा भरोसा' पोर्टल विमा संबंधित पैशांसाठी आहे. नागराजू म्हणाले की हे नवीन इंटिग्रेटेड पोर्टल जनतेसाठी खूप सोयीस्कर असेल. यामुळे त्यांना त्यांची दावा न केलेली रक्कम सहजपणे शोधता येईल. यामुळे प्रणालीमध्ये पारदर्शकता येईल आणि जनतेचा विश्वास वाढेल.