मध्यपूर्वेतील युद्धाचा परिणाम! एअर इंडियाचा प्रवास महागला; प्रवाशांच्या खिशाला कात्री...

Air India Fuel Surcharge: Air India ने ८ एप्रिल पासून देशांतर्गत, तर १० एप्रिलपासून आंतरराष्ट्रीय मार्गावरील फ्यूल सरचार्ज वाढवला आहे.

Air India Fuel Surcharge: जागतिक स्तरावर जेट फ्यूलच्या किमतीत जवळपास १०० टक्क्यांपर्यंत वाढ झाल्यानंतर एअर इंडियाने आपल्या फ्यूल सरचार्जमध्ये वाढ केली आहे. ८ एप्रिल २०२६ पासून कंपनी जुना फ्लॅट सरचार्ज रद्द करून अंतरावर आधारित स्लॅब सिस्टम लागू करणार आहे. या निर्णयामुळे देशांतर्गत आणि आंतरराष्ट्रीय, दोन्ही मार्गांवरील विमानप्रवास महाग होण्याची शक्यता आहे.

बदलामागील कारण

हा निर्णय प्रामुख्याने अमेरिका-इराण युद्ध यामुळे जागतिक जेट फ्यूलच्या किमतीत झालेल्या मोठ्या वाढीमुळे घेतला गेला आहे. एव्हिएशन टर्बाइन फ्यूल (ATF) महागल्यामुळे जगभरातील विमान कंपन्यांच्या ऑपरेशनल खर्चात मोठी वाढ झाली आहे. अशा परिस्थितीत, एअर इंडियाने हा सरचार्जवाढीचा निर्णय घेतला आहे.

#ImportantUpdate

Air India group announces revised fuel surcharges on domestic and international routes.

Read more here: https://t.co/piFcCaA0jJ

— Air India (@airindia) April 7, 2026

अंमलबजावणीची तारीख

देशांतर्गत उड्डाणे - ८ एप्रिल २०२६ पासून
आंतरराष्ट्रीय उड्डाणे - १० एप्रिल २०२६ पासून

एअर इंडियाने देशांतर्गत प्रवासासाठी एकसमान सरचार्ज ऐवजी अंतरावर आधारित मॉडेल लागू केले आहे:

० ते ५०० किमी - प्रति सेक्टर ₹२९९ अतिरिक्त
२००० किमीपेक्षा जास्त अंतर - प्रति सेक्टर ₹८९९ पर्यंत

हा बदल केंद्र सरकारच्या त्या निर्णयाशी सुसंगत आहे, ज्यामध्ये ATF दरवाढ २५% पर्यंत मर्यादित ठेवण्यात आली आहे. तरीही, या वाढीचा परिणाम बहुतेक मार्गांवरील तिकिटांच्या किमतींवर होणार आहे.

आंतरराष्ट्रीय उड्डाणांवरील परिणाम (१० एप्रिलपासून)

आंतरराष्ट्रीय प्रवासासाठी सरचार्ज मोठ्या प्रमाणात वाढवण्यात आला आहे:

उत्तर अमेरिका व ऑस्ट्रेलिया - $२८० (सुमारे ₹२३,४००) प्रति सेक्टर
युरोप व यूके - $२०५ (सुमारे ₹१७,०००) प्रति सेक्टर
आफ्रिका व मध्य आशिया — $१३० (सुमारे ₹१०,८००) प्रति सेक्टर
मिडल ईस्ट - $५० (सुमारे ₹४,२००) प्रति सेक्टर
दक्षिण-पूर्व आशिया व चीन - $१०० (सुमारे ₹८,३००), सिंगापूरसाठी $६०
SAARC देश (नेपाळ, श्रीलंका) - $२४ (सुमारे ₹२,०००) प्रति सेक्टर

यामुळे लांब पल्ल्याच्या प्रवासासाठी ये-जा तिकिटांवर हजारो रुपयांचा अतिरिक्त भार पडणार आहे.

आधीच बुक केलेल्या तिकिटांबाबत दिलासा

एअर इंडियाने स्पष्ट केले आहे की, ८ किंवा १० एप्रिलपूर्वी बुक केलेल्या तिकिटांवर नवीन सरचार्ज लागू होणार नाही. मात्र, प्रवासाची तारीख किंवा मार्ग बदलल्यास नवीन दर लागू होतील.