Artificial Intelligence : आर्टिफिशियल इंटेलिजन्सचा वापर आता प्रत्येक क्षेत्रात वेगाने वाढत आहे, आणि याचा थेट परिणाम रोजगारावर होत असल्याचे दिसत आहे. अनेक ठिकाणी एआयने मानवी कामे करायला सुरुवात केली आहे. असेच एक ताजे आणि धक्कादायक प्रकरण समोर आले आहे! जर तुम्ही एचआर, रिक्रूटमेंट किंवा एक्झिक्युटिव्ह असिस्टंट म्हणून काम करत असाल, तर ही बातमी तुमच्यासाठी खूप महत्त्वाची आहे.
परप्लेक्सिटी एआयचे (Perplexity AI) सीईओ अरविंद श्रीनिवास यांच्या मते, एआय आता फक्त छोटी-मोठी कामे करत नाही, तर त्याने संपूर्ण कामाची प्रक्रिया "स्वतःहून" हाताळायला सुरुवात केली आहे. म्हणूनच, भरती करणाऱ्यांच्या नोकऱ्या धोक्यात आहेत. आणि तेही फक्त पुढच्या ६ महिन्यांत!
एका आठवड्याचे काम, आता फक्त एका 'प्रॉम्प्ट'मध्ये पूर्ण
अरविंद श्रीनिवास यांनी 'द व्हर्ज'च्या पॉडकास्ट 'डिकोडर'मध्ये सांगितले की, "एखादा रिक्रूटर आठवड्याभरात जे काम करतो, ते आता फक्त एका एआय प्रॉम्प्टमध्ये करता येईल." याचा अर्थ असा की, तुम्ही एआयला फक्त 'सूचना' द्याल. "मला स्टॅनफोर्डमध्ये शिक्षण घेतलेले आणि गुगल किंवा ओपनएआयमध्ये काम केलेले १० एआय अभियंते हवे आहेत." आणि एआय आपोआप लिंक्डइन प्रोफाइल शोधेल, त्यांचे ईमेल संपर्क काढेल आणि वैयक्तिकृत ईमेल देखील पाठवेल. तेही कोणत्याही मानवी मदतीशिवाय!
'कॉमेट' : एक खरा एआय एजंट
परप्लेक्सिटी एआयचे नवीन टूल 'कॉमेट' हे साधे सर्च इंजिन नाही, तर ते एक खरा 'एआय एजंट' आहे. हे टूल फक्त सूचना घेत नाही, तर डेटा प्रक्रिया करते आणि सुरुवातीपासून शेवटपर्यंत संपूर्ण कार्य स्वतः करते.
हे टूल तुमच्या जीमेल आणि गुगल कॅलेंडरमध्येही (तुमच्या परवानगीने) प्रवेश करू शकते. त्यामुळे, ते ईमेलला उत्तरे देऊ शकते, मीटिंग्सची वेळ निश्चित करू शकते, वेळेतील समस्या सोडवू शकते आणि मीटिंगपूर्वी मीटिंगचा सारांश देखील तयार करू शकते.
सर्वात आधी कोणावर परिणाम होईल?
अरविंद श्रीनिवास यांच्या मते, एआयचा सर्वात जास्त परिणाम रिक्रूटर्स आणि एक्झिक्युटिव्ह असिस्टंट यांच्यावर होईल. त्यांची दैनंदिन कामे काहीही असोत, जसे की
- उमेदवारांना शोधणे
- मुलाखतींचे वेळापत्रक तयार करणे
- ईमेल पाठवणे
- डेटाबेस तयार करणे
ही सर्व कामे एआय खूप जलद आणि अचूकपणे करू शकते.
भविष्यात मानव काय करेल?
अरविंदचा असा विश्वास आहे की, भविष्यात मानव काम करणार नाहीत, तर फक्त एआयला काय हवे आहे ते सांगतील – आणि एआय ते सर्व करेल. या प्रक्रियेमुळे काम जलद, सोपे आणि स्वस्त होईल, यात शंका नाही. परंतु, त्याचबरोबर लाखो नोकऱ्या देखील धोक्यात येतील, अशी भीती व्यक्त केली जात आहे. एआयमुळे रोजगाराच्या स्वरूपात मोठे बदल होणार हे आता स्पष्ट होत आहे.