तत्काळ तिकीट बुकिंगच्या नियमांमध्ये मोठा बदल! १ जुलैपासून आधार लिंक नसेल तर मिळणार नाही तिकीट

Tatkal ticket Booking : बुकिंग प्रक्रियेत पारदर्शकता, बनावट एजंटांकडून तिकिटांचा काळाबाजार रोखण्यासाठी आणि गरजू प्रवाशांना वेळेवर तिकिटे मिळावीत यासाठी तत्काळ तिकीट बुकिंग नियमांमध्ये बदल करण्यात आले आहेत.

Tatkal ticket Booking : जर तुम्ही रेल्वेने प्रवास करत असाल आणि ऐनवेळी तत्काळ तिकीट बुकिंग करत असाल, तर ही बातमी तुमच्यासाठी अत्यंत महत्त्वाची आहे! पुढच्या महिन्यापासून, म्हणजेच जुलै २०२५ पासून, तत्काळ ट्रेन तिकीट बुकिंग सिस्टीममध्ये मोठा बदल होणार आहे. १ जुलैपासून, ज्या प्रवाशांचे आधार कार्ड त्यांच्या आयआरसीटीसी (IRCTC) खात्याशी लिंक केलेले नाही, त्यांना आयआरसीटीसीच्या वेबसाइट किंवा मोबाईल ॲपद्वारे तत्काळ तिकिटे बुक करता येणार नाहीत. रेल्वेने आधार प्रमाणीकरण (Aadhaar Authentication) आणि ओटीपी (OTP) आधारित पडताळणी अनिवार्य केली आहे.

१५ जुलैपासून ओटीपी आधारित पडताळणी बंधनकारक
या बदलांनुसार, १५ जुलैपासून प्रत्येक तत्काळ बुकिंगवर तुमच्या आधारशी जोडलेला ओटीपी देखील प्रविष्ट करावा लागेल. याचा उद्देश बुकिंग करताना वापरकर्त्याची ओळख सुनिश्चित करणे हा आहे. रेल्वे मंत्रालयाच्या म्हणण्यानुसार, बुकिंग प्रक्रियेत अधिक पारदर्शकता आणण्यासाठी, बनावट एजंटांकडून होणारा तिकिटांचा काळाबाजार रोखण्यासाठी आणि आपत्कालीन परिस्थितीत गरजू प्रवाशांना वेळेवर तिकिटे मिळावीत यासाठी हे नियम बदलण्यात आले आहेत. तत्काळ तिकिटे फक्त भारतीय रेल्वेच्या संगणकीकृत पीआरएस काउंटर किंवा अधिकृत एजंटद्वारे बुक करता येतात.

तुमचे आयआरसीटीसी खाते आधारशी कसे लिंक कराल?
जर तुम्ही अद्याप तुमचा आधार आयआरसीटीसी खात्याशी लिंक केला नसेल, तर काळजी करू नका. हे काम तुम्ही घरी बसून सहज करू शकता. खालील सोप्या चरणांचे अनुसरण करा.

1. IRCTC च्या अधिकृत वेबसाइट www.irctc.co.in वर जा.
2. तुमच्या वापरकर्ता नाव (username) आणि पासवर्डने लॉगिन करा.
3. वेबसाइटवर ‘माझे प्रोफाइल’ (My Profile) विभागात जा.
4. आता ‘माझे खाते’ (My Account) किंवा ‘माझे प्रोफाइल’ (My Profile) पर्यायावर क्लिक करा.
5. प्रोफाइलमध्ये तुम्हाला 'आधार केवायसी' (Aadhaar KYC) हा पर्याय दिसेल, त्यावर क्लिक करा.
6. त्यानंतर, तुमचा आधार क्रमांक प्रविष्ट करा.
7. आधार क्रमांक टाकल्यावर 'ओटीपी पाठवा' (Send OTP) वर क्लिक करा.
8. तुमच्या आधार नोंदणीकृत मोबाइल नंबरवर एक ओटीपी पाठवला जाईल. तो ओटीपी नियुक्त केलेल्या ठिकाणी प्रविष्ट करा आणि पडताळणी करा.
9. पडताळणी (verification) यशस्वी झाल्यानंतर, तुमचे आयआरसीटीसी खाते आधारशी लिंक केले जाईल.

वाचा - तुमचेही पैसे रिअल इस्टेटमध्ये अडकलेत का? फक्त १% लोकच कमवतायत नफा! तुम्ही 'या' चुका तर करत नाहीये ना?

हे बदल प्रवाशांच्या सोयीसाठी आणि गैरप्रकार टाळण्यासाठी करण्यात आले आहेत. त्यामुळे, वेळेत आपले आधार कार्ड आयआरसीटीसी खात्याशी लिंक करून घ्या, जेणेकरून तत्काळ तिकीट बुकिंग करताना कोणतीही अडचण येणार नाही.