Maharashtra Weather Update : राज्यातील वातावरणात पुन्हा एकदा थंडीचा जोर वाढताना दिसत आहे. उत्तर दिशेकडून सक्रिय झालेल्या थंड वाऱ्यांच्या प्रवाहामुळे राज्यातील अनेक भागांमध्ये किमान तापमानात लक्षणीय घट झाली आहे.(Maharashtra Weather Update)
विशेषतः विदर्भ, मराठवाडा आणि मध्य महाराष्ट्रात रात्री व पहाटे गारठा अधिक तीव्रतेने जाणवत आहे. काही ठिकाणी ढगाळ वातावरणामुळे पहाटे धुक्याची चादर पसरल्याचे चित्र पाहायला मिळत आहे.(Maharashtra Weather Update)
IMD ने दिलेल्या माहितीनुसार, पुढील दोन दिवस राज्यात तापमानात चढ-उतार सुरू राहणार असून थंडीचा प्रभाव कायम राहण्याची शक्यता आहे. विशेषतः मध्य महाराष्ट्र आणि मराठवाड्यात गारठा टिकून राहणार असल्याचा अंदाज व्यक्त करण्यात आला आहे.(Maharashtra Weather Update)
राज्यातील प्रमुख शहरांतील किमान तापमान
शुक्रवारी (९ जानेवारी) रोजी राज्यातील अनेक शहरांमध्ये किमान तापमानाने निच्चांकी पातळी गाठली.
पुणे : ८.४ अंश सेल्सिअस
नाशिक : ९.१ अंश
सातारा : १० अंश
अहमदनगर : ७.५ अंश
नांदेड : ९.८ अंश
छत्रपती संभाजीनगर : १०.७ अंश
या तापमानामुळे नागरिकांना सकाळी व रात्री उबदार कपड्यांचा आधार घ्यावा लागत आहे.
कोकणात हवामान कसे राहणार?
कोकण किनारपट्टी भागात हवामान प्रामुख्याने स्वच्छ राहण्याचा अंदाज आहे. मुंबई शहरात दिवसाचे कमाल तापमान सुमारे ३२ अंश सेल्सिअसपर्यंत जाण्याची शक्यता असून, रात्रीचे तापमान १८ अंशांपर्यंत खाली येऊ शकते.
पावसाची कोणतीही शक्यता नसल्याने हवा कोरडी राहणार आहे. त्यामुळे दिवसाच्या वेळेत उष्णता जाणवेल, तर रात्री सौम्य थंडीचा अनुभव येईल.
मध्य महाराष्ट्रात थंडीचा कडाका
पुणे, नाशिक, अहमदनगर, कोल्हापूर, सांगली आणि सातारा या भागांमध्ये पुढील दोन दिवस थंडीचा जोर वाढण्याची शक्यता वर्तविण्यात आली आहे.
पहाटेच्या वेळी गार वारे वाहणार असून पुणे परिसरात सकाळच्या वेळेत धुक्याची शक्यता हवामान विभागाने व्यक्त केली आहे.
दिवसाचे कमाल तापमान साधारणतः ३० अंशांच्या आसपास, तर रात्रीचे किमान तापमान १० अंशांपर्यंत घसरण्याचा अंदाज आहे.
मराठवाडा आणि विदर्भात काय स्थिती?
मराठवाडा आणि विदर्भात सकाळच्या वेळी थंडीचा जोर अधिक जाणवणार आहे. काही भागांमध्ये आकाश अंशतः ढगाळ राहण्याची शक्यता आहे. छत्रपती संभाजीनगरसह इतर जिल्ह्यांमध्ये तापमानात फारसा मोठा बदल होणार नसला, तरी गारठा कायम राहणार आहे.
विदर्भात थंडी अधिक तीव्र राहण्याची चिन्हे आहेत. सकाळच्या वेळेत कडाक्याची थंडी जाणवणार असून काही ठिकाणी रात्रीचे तापमान १० अंशांच्या आसपास पोहोचण्याची शक्यता आहे. त्यामुळे दिवसभर हुडहुडी भरणारी थंडी कायम राहू शकते.
पुढील दोन दिवसांचा अंदाज
पहाटे व रात्री थंडी अधिक जाणवेल
किमान तापमानात चढ-उतार संभव
कोरडे हवामान, पावसाची शक्यता नाही
शेतकऱ्यांनी व नागरिकांनी थंडीपासून आवश्यक ती खबरदारी घेण्याचे आवाहन
शेतकऱ्यांना सल्ला
* गहू, हरभरा, वाटाणा, भाजीपाला पिकांवर थंडीचा परिणाम होऊ शकतो.
* रात्री उशिरा पाणी देणे टाळा, असा सल्ला देण्यात आला आहे.