Maharashtra Weather Update : राज्यात फेब्रुवारीचा शेवट जवळ आला असताना हिवाळ्याची चाहूल फारशी जाणवत नाही. उलट, उन्हाळ्याची चाहूल आधीच लागल्याचे चित्र आहे. (Maharashtra Weather Update)
आज (२१ फेब्रुवारी) रोजी संपूर्ण महाराष्ट्रात कोरडे आणि उष्ण हवामान राहणार असल्याचा अंदाज भारतीय हवामान विभाग यांनी व्यक्त केला आहे.राज्यातील बहुतांश भागात आकाश स्वच्छ राहणार असून सूर्यप्रकाश तीव्र जाणवण्याची शक्यता आहे.
तापमानात सातत्याने वाढ
हिवाळ्याने लवकर माघार घेतल्यामुळे वातावरणातील कोरडेपणा वाढला आहे. ढगांचा अभाव आणि स्वच्छ आकाशामुळे दुपारच्या वेळेस उन्हाचा चटका अधिक जाणवत आहे.
काही भागांत कमाल तापमानात १ अंश सेल्सिअसपर्यंत वाढ होऊ शकते. मार्चच्या सुरुवातीपर्यंत तापमानात हळूहळू वाढ होत राहील, असा अंदाज व्यक्त करण्यात आला आहे.
विभागनिहाय हवामान अंदाज
कोकण व मुंबई परिसर
मुंबई, ठाणे, नवी मुंबई आणि किनारपट्टी भागात उष्ण व दमट हवामान राहील.
कमाल तापमान: ३२ ते ३४°C
किमान तापमान: २२ ते २४°C
आर्द्रतेमुळे उकाडा अधिक जाणवण्याची शक्यता.
पश्चिम महाराष्ट्र
पुणे, सांगली, कोल्हापूर, सातारा येथे सकाळी किंचित गारवा; मात्र दुपारी तापमान झपाट्याने वाढणार.
कमाल तापमान: ३४ ते ३६°C
किमान तापमान: १७ ते १९°C
मराठवाडा व विदर्भ
छत्रपती संभाजीनगर, लातूर, परभणी, नांदेड तसेच नागपूर, अमरावती, अकोला भागात उष्णतेची तीव्रता अधिक राहणार.
कमाल तापमान: ३५ ते ३७°C
किमान तापमान: १९ ते २२°C
शेतकरी आणि नागरिकांसाठी महत्त्वाचा इशारा
सध्या रब्बी हंगामातील पिके अंतिम टप्प्यात असल्याने वाढत्या उष्णतेचा परिणाम पिकांवर होऊ शकतो.
विशेषतः गहू, हरभरा आणि भाजीपाला पिकांवर ताण येण्याची शक्यता आहे. शेतकऱ्यांनी सकाळी किंवा सायंकाळी पाणी देण्याचे नियोजन करावे, असे कृषी तज्ज्ञ सांगतात.
कामानिमित्त बाहेर पडणारे नागरिक आणि ज्येष्ठ नागरिकांनी दुपारच्या १२ ते ४ या वेळेत शक्यतो उन्हात जाणे टाळावे. पुरेसे पाणी पिणे, हलके सूती कपडे वापरणे आणि डोके झाकून बाहेर पडणे आवश्यक आहे.
पुढील काही दिवसांचा अंदाज
२१ फेब्रुवारीनंतरही राज्यात कोरडे हवामान कायम राहण्याची शक्यता आहे. पावसाची कोणतीही शक्यता सध्या व्यक्त करण्यात आलेली नाही.
मार्चच्या पहिल्या आठवड्यापर्यंत तापमानात टप्प्याटप्प्याने वाढ होईल, असा अंदाज आहे.
शिमग्याआधीच राज्यात उन्हाचा पारा चढू लागला असून येत्या दिवसांत उष्णतेची तीव्रता आणखी वाढू शकते. नागरिकांनी सावधगिरी बाळगून आरोग्याची काळजी घेणे गरजेचे ठरणार आहे.