प्रवीण कुवरांची 'फुगडी' लवकरच चाहत्यांच्या भेटीला

गायक आणि संगीतकार प्रवीण कुवर यांचे अजून एक नवे चित्रपट गीत लवकरच चाहत्यांच्या भेटीला येत आहे.

ठळक मुद्दे'फुगडी...' गाण्याचे ध्वनीमुद्रण संपन्न'फुगडी...' गाण्याचे चित्रीकरण होणार लवकरच

झी मराठीवरील 'लागीर झालं जी' या लोकप्रिय मालिकेचे पार्श्वगीत 'ये रे ये रे पावसा' चित्रपटाचे शीर्षक गीत, 'लव्ह लफडे' चित्रपटातील 'ताईच्या लग्नाला' यासारखी एकापेक्षा एक सुपरहिट गाणी देणारे गायक आणि संगीतकार प्रवीण कुवर यांचे अजून एक नवे चित्रपट गीत लवकरच चाहत्यांच्या भेटीला येत आहे. पण या चित्रपटाचे नाव मात्र अद्याप गुलदस्त्यात आहे. दुर्वा एण्टरटेनमेंट प्रस्तुत आणि निलेश पाटील ( शेलिनो ड्रीम्स इन्फोटेन्मेंट ) निर्मित 'फुगडी' या गाण्याचे गायक प्रवीण कुवर यांच्या स्वरसाजात गाण्याचे रेकॉर्डींग नुकतेच अंधेरी येथील युफोनी स्टुडिओमध्ये पार पडले. यावेळी गायक प्रवीण कुवर यांच्यासह दिग्दर्शक सुकेश सावर्डेकर आदी उपस्थित होते. 

'फुगडी...' या गाण्याची रचना नवोदित गीतकार रमझान पठाण यांची असून दिग्दर्शन सुकेश सावर्डेकर यांनी केले आहे. या गाण्यावर अभिनेता चेतन कुमावत थिरकणार असून चेतनने याआधी बरीच व्यावसायिक नाटक, 'लोकमान्य एक युगपुरुष' हा चित्रपट, तसेच कलर्स मराठी वरील 'कुंकू टिकली टॅटू' या मालिकेत काम केले आहे. या मालिकेतील त्याने साकारलेला खलनायक विशेष गाजला. त्यामुळे आता या गाण्यात तो काय धम्माल करणार हे पाहणे औसुक्याचे ठरणार आहे.

दुर्वा एण्टरटेन्मेंट प्रस्तुत 'फुगडी' हे एक मराठी सोबतच हिंदी टच असलेले भन्नाट गाणे लवकरच चेतन कुमावतच्या आगामी चित्रपटातून प्रेक्षकांच्या भेटीला येणार असून हिंदी टच व्यतिरिक्त इतर अनेक गमतीजमती या गाण्यात पाहायला मिळणार आहेत. सुकेश सवर्डेकर यांनी याआधी मराठी चित्रपट विठ्ठला शप्पथची निर्मिती केली आहे. निलेश पाटील यांची ही पहिलीच निर्मिती असून लवकरच या गाण्याच्या चित्रीकरणालाही सुरुवात होणार आहे.