Kitchen Tips: जुने बनियन किंवा ओढण्या फेकून देऊ नका! घरासाठी तयार करा स्वस्त आणि मस्त 'क्लीनिंग वाईप्स'

Kitchen Tips: महागडे क्लिनिंग वाईप्स वारंवार विकत घेणे परवडत नाही, अशा वेळी घरीच असलेल्या सामानातून हे कसे तयार करायचे ते शिकून घ्या!

किचनमधील तेलकटपणा आणि चिकट डाग साफ करणे हे खरं तर मोठं जिकीरीचं काम. बाजारात मिळणारे महागडे 'क्लीनिंग वाईप्स' (Cleaning Wipes) संपले की पुन्हा आणण्याचा कंटाळा येतो. अशा वेळी आपल्या घरातील टाकाऊ वस्तूंचा वापर करून आपण अत्यंत प्रभावी आणि स्वस्त वाईप्स तयार करू शकतो.

येथे एक असा घरगुती उपाय आहे जो तुमचे किचन चमकावून टाकेल आणि तुम्हाला ते कापड पुन्हा धुवत बसण्याची गरजही उरणार नाही!

स्वयंपाकघरातील चिमणी, गॅसची शेगडी किंवा मिक्सरवर साचलेला तेलकट थर काढण्यासाठी आपण तासनतास घासतो. पण आता टेन्शन घेऊ नका. खालील पद्धतीचा वापर करून तुम्ही 'युज अँड थ्रो' वाईप्स बनवू शकता.

साहित्य:

पाणी: २ कप

व्हिनेगर: २ चमचे (तेलकटपणा काढण्यासाठी उत्तम)

ग्लिसरीन: १ चमचा (वस्तूंना चकाकी देण्यासाठी)

लिंबाचा रस: १ लिंबू (नैसर्गिक क्लिनर आणि सुगंधासाठी)

डिश वॉशर लिक्विड: ४ चमचे

जुने सुती कापड: वापरात नसलेले बनियन, कॉटन परकर किंवा जुन्या ओढण्या.

काचेची किंवा प्लास्टिकची बाटली/बरणी: मिश्रण भरण्यासाठी.

कृती 

१. मिश्रण तयार करा: एका बाऊलमध्ये २ कप पाणी घेऊन त्यात व्हिनेगर, ग्लिसरीन, लिंबाचा रस आणि डिश वॉश लिक्विड नीट मिक्स करून घ्या.
२. कापडाचे तुकडे: जुन्या सुती कापडाचे छोटे छोटे चौकोनी तुकडे कापून घ्या. सुती कापड पाणी आणि लिक्विड लवकर शोषून घेते, त्यामुळे ते उत्तम काम करते.
३. बाटलीत भरणे: हे कापडाचे तुकडे एका बाटलीत भरा. वरून तयार केलेले मिश्रण ओता.
४. शोषून घेऊ द्या: बाटलीत एवढेच कापड भरा जेणेकरून सर्व लिक्विड त्या कापडात शोषले जाईल आणि पाणी बाटलीबाहेर येणार नाही.

कुठे आणि कसा वापर करावा?

हे वाईप्स ओले असल्यामुळे तुम्ही ते थेट बाटलीतून काढून खालील गोष्टींसाठी वापरू शकता:

तेलकट बरण्या: मसाल्याच्या किंवा तेलाच्या बरण्यांना बाहेरून पुसण्यासाठी.

किचन चिमणी: चिमणीवर साचलेला चिकट थर झटपट निघतो.

मिक्सर आणि ग्राइंडर: वापरून झाल्यावर त्यावरचे डाग काढण्यासाठी.

गॅस शेगडी आणि ओटा: स्वयंपाक झाल्यावर ओटा पुसण्यासाठी हे वाईप्स अत्यंत प्रभावी आहेत.

सर्वात मोठा फायदा: हे कापडाचे तुकडे टाकाऊ वस्तूंपासून बनवलेले असल्यामुळे, एकदा वापरून झाले की तुम्ही ते थेट कचऱ्यात टाकू शकता. ते पुन्हा धुवत बसण्याचा त्रास आणि वेळ दोन्ही वाचते!