IAS पित्याचा मोठा निर्णय! ३ वर्षांच्या मुलीला घातलं शासकीय अंगणवाडीत; सोशल मीडियावर रंगली उलटसुलट चर्चा

एक व्हिडीओ इंटरनेटवर व्हायरल झाला आहे, ज्यामध्ये सिया अंगणवाडीत खेळताना आणि शिकताना दिसत आहे.

मध्य प्रदेशातील चित्रकूट येथील एका घटनेने सोशल मीडियावर सर्वांचं लक्ष वेधून घेतलं आहे. चित्रकूटचे जिल्हा दंडाधिकारी पुलकित गर्ग यांनी आपल्या तीन वर्षांची मुलगी सियाला सरकारी अंगणवाडी केंद्रात दाखल करण्याचा मोठा निर्णय घेतला आहे. हे पाऊल केवळ त्यांचा वैयक्तिक निर्णय नसून सरकारी शिक्षण व्यवस्थेची स्थिती आणि गुणवत्तेवर विश्वास दर्शवणारे एक प्रतीक मानलं जात आहे.

या घटनेनंतर एक व्हिडीओ इंटरनेटवर व्हायरल झाला आहे, ज्यामध्ये सिया अंगणवाडीत खेळताना आणि शिकताना दिसत आहे. या व्हिडिओमुळे सर्वसामान्यांमध्ये सार्वजनिक शिक्षण पर्यायांबद्दलच्या दृष्टिकोनावर एक नवीन चर्चा सुरू झाली आहे. काही लोक या निर्णयाला प्रेरणादायी मानत आहेत, तर काही लोकांनी यावर प्रश्नचिन्ह उपस्थित करत चिंता व्यक्त केली आहे.

"अंगणवाडी केंद्रांच्या परिस्थितीत मोठी सुधारणा"

पुलकित गर्ग यांचं असं मत आहे की, गेल्या काही वर्षांत सरकारी शाळा आणि अंगणवाडी केंद्रांच्या परिस्थितीत मोठी सुधारणा झाली आहे. 'दैनिक भास्कर'शी बोलताना त्यांनी सांगितलं की, आता संसाधनांची कमतरता नाही आणि शिक्षणाच्या गुणवत्तेतही सातत्याने सुधारणा होत आहे. जर एखादा आयएएस अधिकारी आपल्या पाल्याला सरकारी संस्थेत शिकवू शकतो, तर सामान्य पालकांनी संकोच करण्याचे काहीच कारण नाही, असंही त्यांनी नमूद केलं.

"लोकांच्या मानसिकतेत बदल"

गर्ग यांनी पुढे सांगितलं की, लोकांच्या मानसिकतेत बदल झाला आहे. पूर्वी अनेक पालक सरकारी शाळा आणि अंगणवाड्यांना दुय्यम समजत असत, परंतु आता हा दृष्टिकोन बदलत आहे. बालपणातील सुरुवातीच्या विकासावर भर देताना ते म्हणाले की, आरोग्य, पोषण, शिकण्याचं वातावरण आणि संस्कार मुलांच्या जडणघडणीत महत्त्वाची भूमिका बजावतात. अंगणवाडी केंद्र केवळ शिक्षणच देत नाहीत, तर मुलांना सुरक्षित आणि पोषक वातावरणही प्रदान करतात.

IAS अधिकाऱ्याचं आवाहन

पुलकित गर्ग यांनी पालक, ग्रामीण जनता आणि सरकारी अधिकाऱ्यांना आवाहन केलं की, त्यांनी सामाजिक पूर्वग्रह दूर करून सार्वजनिक शिक्षण व्यवस्थेवर विश्वास ठेवावा. जेव्हा लोक या व्यवस्थेवर विश्वास दाखवतील, तेव्हाच ती अधिक मजबूत आणि प्रभावी होईल, असे त्यांचं म्हणणं आहे.

सोशल मीडियावर संमिश्र प्रतिक्रिया

सोशल मीडियावर या निर्णयावर संमिश्र प्रतिक्रिया पाहायला मिळाल्या. काही लोकांनी या निर्णयावर टीका करताना म्हटलं की, अंगणवाडी केंद्रांच्या पायाभूत सुविधा पूर्णपणे मानकांनुसार नाहीत आणि त्यात अनेक त्रुटी असू शकतात. केवळ इतरांना प्रेरित करण्यासाठी असे पाऊल उचलणं पुरेसं नाही, असा इशाराही त्यांनी दिला. दुसरीकडे अनेक युजर्सनी गर्ग यांच्या निर्णयाचे जोरदार समर्थन केलं आहे. त्यांच्या मते, हे एक स्तुत्य पाऊल असून इतर सरकारी अधिकाऱ्यांसाठी हा एक आदर्श ठरू शकतो.