प्रत्येक यशस्वी पुरुषाच्या मागे एक स्त्री असते असं म्हणतात. पण अनेकदा स्त्रीच्या मागेही तिला आयुष्यभराची साथ देणारा खंबीर पुरुष असतो. जेव्हा आपल्या जोडीदाराकडून फक्त प्रेमच नाही तर आदर, पाठिंबा मिळतो तेव्हा महिला खरोखरच भाग्यवान असतात. अशीच एक कणखर महिला म्हणजे चॅम्पियन एथलीट सिमरन शर्मा.
वर्ल्ड चॅम्पियन, पॅरालिम्पिक पदक विजेती आणि अर्जुन पुरस्कार विजेती सिमरनने तिच्या यशाचं श्रेय पती गजेंद्र याला दिलं आहे. भारतीय सैन्यात असलेल्या गजेंद्रने सिमरनला पाठिंब्यासोबतच ट्रेनिंगही दिलं आणि तिच्या कोचची भूमिकाही चोख बजावली. यासाठीच सिमरनने आपल्या पतीचे आभार मानले आणि भरभरून कौतुक केलं आहे.
"तू सोबत असताना प्रत्येक ध्येय शक्य"
"यश हे फक्त कठोर परिश्रमाने मिळत नाही, त्यासाठी एका खऱ्या जोडीदाराची देखील गरज असते. गजेंद्र, तुझ्या पाठिंब्यामुळेच मी कधीच खचली नाही. तू सोबत असताना प्रत्येक ध्येय शक्य आहे. लग्न झाल्यावर अनेक मुलींचं आयुष्य संपतं, पण माझं तेव्हाच सुरू झालं. माझ्या नवऱ्याने मला वर्ल्ड चॅम्पियन केलं" असं सिमरन शर्माने म्हटलं आहे.
सिमरनला ट्रेनिंग देण्यासाठी नव्हते पैसे
सिमरन ही उत्तर प्रदेशातील मोदी नगरची रहिवासी आहे. सिमरनच्या कुटुंबाकडे सिमरनला ट्रेनिंग देण्यासाठी पुरेसे पैसे नव्हते. गजेंद्र सिंह आणि सिमरन शर्मा यांचा प्रेमविवाह झाला. सिमरनची स्वप्नं सत्यात उतरवण्यासाठी, खेळात प्रगती करता यावी यासाठी पती गजेंद्रने शक्य तितके सर्व प्रयत्न केले.
"आमच्याकडचे पैसे संपले"
"आयुष्यात असा एक काळ आला जेव्हा आमच्याकडचे पैसे संपले आणि गजेंद्रने त्याच्या खाण्यापिण्याच्या सवयींचा त्याग केला. त्याला ज्यूस पिण्याची खूप आवड होती. मला ज्यूस देण्यासाठी पैसे नसल्याने गजेंद्रने ज्यूस पिणं बंद केलं होतं. यासोबतच गजेंद्रला शूज आणि इतर अनेक गोष्टींचीही आवड होती, पण माझ्यामुळे त्याने सर्व काही सोडलं. त्याची जमीनही विकली" असं सिमरन शर्माने एका मुलाखतीत म्हटलं आहे.