माजी भारतीय टेनिस स्टार सानिया मिर्झाने तिच्या 'सर्व्हिंग इट अप विथ सानिया' (Serving It Up with Sania) या पॉडकास्टमध्ये एक अत्यंत वैयक्तिक आणि महत्त्वाचा खुलासा केला आहे. तिचा मुलगा 'इझान मिर्झा मलिक' (Izhaan Mirza Malik) याचा नैसर्गिकरित्या जन्म झाल्यानंतरही, तिने 'एग फ्रीजिंग' (Egg Freezing) म्हणजेच 'अंडी गोठवण्याची' प्रक्रिया करून घेतली, ज्याबद्दल फार कमी लोकांना माहिती होते. तिच्या या निर्णयाने प्रजनन आरोग्य (Reproductive Health) आणि महिलांच्या निवडींवर एक नवा आणि महत्त्वाचा संवाद सुरू केला आहे.
सानियाने या निर्णयाला 'विचारपूर्वक उचललेले पाऊल' आणि भविष्यातील एक 'सुरक्षित गुंतवणूक' म्हटले आहे. तिने स्पष्ट केले की, जरी तिचा पहिला मुलगा नैसर्गिकरित्या झाला असला तरी, वयाच्या वाढत्या आकड्यामुळे महिलांच्या प्रजनन क्षमतेवर जो परिणाम होतो, तो टाळण्यासाठी तिने हा निर्णय घेतला.
"मी माझ्या अंड्यांचे फ्रीजिंग केले आहे हे फार कमी लोकांना माहीत आहे. मी प्रत्येकाला याची शिफारस करते, कारण जैविक घड्याळ कोणासाठी थांबत नाही. समजा, तुम्हाला भविष्यात दुसरे बाळ हवे असेल, तर माझ्याकडे आता एक सुरक्षित आणि उच्च-गुणवत्तेच्या पेशींचा पर्याय उपलब्ध आहे," असे ती पॉडकास्टमध्ये म्हणाली.
आजच्या जगात अनेक महिला करिअरला प्राधान्य देतात किंवा इतर वैयक्तिक कारणांमुळे दुसऱ्या प्रेग्नेंसीसाठी विलंब करतात. साधारणपणे, ३५ वर्षांनंतर महिलांची अंडी तयार करण्याची क्षमता आणि त्यांची गुणवत्ता कमी होऊ लागते. अशा वेळी, कमी वयात, चांगल्या गुणवत्तेची अंडी गोठवून ठेवणे हा त्यांना भविष्यातील मातृत्व सुरक्षित करण्याचा एक आश्वस्त करणारा आणि व्यावहारिक उपाय आहे. या प्रक्रियेमुळे महिलांना त्यांच्या वैयक्तिक जीवनावर अधिक नियंत्रण मिळवता येते.
गाऊन घालणं बोअरिंग दिसतं? घरात वापरायला ३०० रुपयांत घ्या कॉटनचे नाईट सुट्स; ८ नवीन पॅटर्न
सानिया मिर्झासारख्या सेलिब्रिटीने हा वैयक्तिक अनुभव सार्वजनिकरित्या शेअर केल्यामुळे, 'एग फ्रीजिंग' सारख्या प्रगत वैद्यकीय प्रक्रियेबद्दल सामान्य महिलांमध्ये, विशेषत: मेट्रो सिटीमधील महिलांमध्ये जागरूकता निर्माण होण्यास नक्कीच मदत मिळेल. हा केवळ एक वैद्यकीय पर्याय नसून, प्रत्येक स्त्रीला तिच्या जीवनातील महत्त्वाचे निर्णय तिच्या सोयीनुसार आणि वेळेनुसार घेण्याचे स्वातंत्र्य देणारा पर्याय आहे.