Constipation And Heart Problems : बद्धकोष्ठता आजकाल एक कॉमन समस्या मानली जाते. त्यामुळे लोक याकडे दुर्लक्ष करतात. या समस्येकडे लक्ष न दिल्यानं काही वर्ष ती तशीच राहते. बद्धकोष्ठतेची समस्या जास्त दिवस राहिली तर या स्थितीला क्रॉनिक कॉन्स्टिपेशन असं म्हटलं जातं. पोटात गडबड झाल्यानं लोकांना गॅस, अपचन आणि अ‍ॅसिडिटी अशा समस्या होतात. जर पोट व्यवस्थित साफ झालं नाही तर कोणत्या कामातही लक्ष लागत नाही. सतत अस्वस्थ वाटत राहतं. अशात ही केवळ पोटाची समस्या राहत नाही तर यानं तुमच्या हृदयाचं आरोग्यही धोक्यात येऊ शकतं.
जर एखाद्या व्यक्तीचं पोट आठड्यातून केवळ तीन ते चार वेळीच साफ होत असेल, त्यातही जोर लावावा लागत असेल तर या स्थितीला क्रॉनिक कॉन्स्टिपेशन म्हटलं जातं. त्यासोबतच टॉयलेटमध्ये बसून जोर लावावा लागत असेल, संडास अर्धीच होत असेल तर हेही बद्धकोष्ठतेचं लक्षण आहे. जर ही समस्या जास्त काळ राहिली तर शरीरातील इतर अवयव सुद्धा प्रभावित होतात. अशात जिनोवा शेल्बीच्या इंटरनल मेडिसीन आणि सीनिअर कंसल्टेंट डॉ उर्वी यांनी बद्धकोष्ठता आणि हृदयासंबंधी समस्यांमध्ये कसं कनेक्शन असतं याबाबत OnlymyHealth.com ला माहिती दिली.
जास्त जोर लावल्यानं हृदयावर दबाव
जेव्हा व्यक्ती बद्धकोष्ठतेमुळे संडास करण्यासाठी जास्त रोज लावते, तेव्हा त्यावेळी शरीरात ब्लड प्रेशर आणि हार्ट रेट वाढतो. या अचानक झालेल्या तणावामुळे हृदयावर प्रभाव पडतो. काही केसेसमध्ये या स्थितीत हार्ट अ‍ॅटॅकही येऊ शकतो. खासकरून अशा लोकांना जे आधीच हृदयरोगाने पीडित आहेत.
वेगस नर्व्हवर प्रभाव
संडास करतेवेळी जर जास्त जोर लावला तर अधिक दबावामुळे यानं वेगस नर्व्ह सक्रिय होते. ही नर्व्ह शरीरात ब्लड प्रेशर आणि हार्ट रेटला नियंत्रित करते. वेगस नर्व्ह ही आपल्या शरीरातील सर्वात लांब आणि मज्जातंतू आहे. ही मज्जातंतू मेंदूपासून सुरू होऊन चेहरा, मान, छाती आणि पोटातून खाली जाते. नर्व्ह जास्त सक्रिय झाल्यानं ब्लड प्रेशर अचानक कमी होतं आणि हृदयाचे ठोके कमी होतात. ज्याला वॅसोवॅगल सिंकोप असं म्हटलं जातं. ही स्थिती जीवघेणी ठरू शकते.
आतड्यांमध्ये टॉक्सिन्स जमा होणे
रोज जर पोट व्यवस्थित साफ होत नसेल तर आतड्यांमध्ये विषारी तत्व जमा होतात. यामुळे आतड्यांवर सूज येते. तसेच या विषारी तत्वांमुळे नसांचं नुकसान होऊन एथेरोस्क्लेरोसिस सारखी स्थिती निर्माण होऊ शकते. जी हृदयरोगाच्या प्रमुख कारणांपैकी एक आहे.
शरीरात तणाव आणि चिंता
बद्धकोष्ठतेमुळे केवळ शरीराचं नुकसान होतं असं नाही तर मानसिक तणावही वाढतो. जास्त काळापासून ही समस्या असेल तर व्यक्तीचा चिडचिडपणा, अस्वस्थता आणि चिंता वाढते. या मानसिक तणावामुळे ब्लड प्रेशर वाढू शकतं.
चुकीची लाइफस्टाईल
बद्धकोष्ठतेची समस्या वेगवेगळ्या कारणांनी होऊ शकते. जसे की, आहारात फायबरची कमतरता, पाणी कमी पिणे, शरीराची हालचाल कमी करणे, अनहेल्दी फूड खाणे, पुरेशी झोप न घेणे इत्यादी. याच गोष्टींमुळे हृदयाचं सुद्धा आरोग्य बिघडतं.
काय करू शकता उपाय?
बद्धकोष्ठतेची समस्या होऊ द्यायची नसेल किंवा झालेली दूर करायची असेल तर आहारात वेगवेगळी फळं, भाज्या, कडधान्य आणि डाळींचा समावेश करा.
दिवसभरातून किमान ८ ते १० ग्लास पाणी नक्की प्या. यानं विष्ठा मुलायम होण्यास मदत मिळते.
पायी चालणं, योगा, सायकल चालवणं किंवा धावल्यानं बद्धकोष्ठता दूर होते आणि हृदय सुद्धा निरोगी राहतं.
जर ही समस्या खूप जास्त दिवसांपासून असेल तर जराही वेळ न घालवता डॉक्टरांकडे जा. त्यांच्या सल्ल्यानं योग्य ते उपाय करा.