उन्हाळा सुरू झाला की शरीराला थंडावा देणाऱ्या पदार्थांची गरज जास्त जाणवते. अशा वेळी अनेकांना सहज आठवण होते ती म्हणजे लस्सी. दह्यापासून तयार होणारे हे पेय केवळ चविष्टच नाही तर शरीराला ताजेतवाने ठेवणारेही आहे. त्यामुळेच अनेकांना लस्सी प्यायला आवडते आणि ती कंटाळवाणीही वाटत नाही. त्यात विविध प्रकार आहेत. त्यापैकी एक म्हणजे रोज लस्सी.
लस्सीची खास गोष्ट म्हणजे पोटावर हलकी, थंडावा देणारी आणि पचायला सोपी. उन्हाळ्यात शरीरातून घामामुळे पाणी आणि मीठ कमी होतं. अशा वेळी लस्सी प्यायल्याने शरीराला ऊर्जा मिळते आणि थकवा कमी होतो. त्यामुळे दुपारच्या जेवणानंतर किंवा गरमीमध्ये लस्सी पिणे अनेकांना आवडते. त्यात जर गुलकंद असेल तर त्याची चव आणखी जबरदस्त लागते. पाहा रेसिपी.
साहित्य
दही, गुलकंद, रोज सिरप, साखर, वेलची पूड, पाणी, काजू, बदाम
कृती
१. मिक्सरमधून साखर वाटून घ्यायची. मस्त पिठीसाखर तयार करायची. ती लवकर विरघळते आणि घट्टपणा चांगला येतो. गुलकंद गोड असतो. त्यामुळे जर अति तिखट आवडत नसेल तर साखर नाही घातली तरी हरकत नाही.
२. एका खोलगट भांड्यात दही घ्यायचं. त्यात वेलची पूड घालायची. तसेच थोडं पाणी घालायचं, थोडं रोज सिरप घालायचं. सगळं मस्त एकरुप होऊ द्यायचं. मग रवीच्या मदतीने व्यवस्थित घुसळायचं. मिक्सरमध्ये त्याला फेस आणि घट्टपणा तसा फार छान येत नाही. तुम्हाला मिक्सर वापरायचा असेल तर तसंही करता येतं.
३. लस्सी छान घट्ट आणि फेसाळलेली तयार झाली की फ्रिजमध्ये गार करत ठेवायची. बर्फ घालून घुसळली तर पातळ होते. त्यामुळे तयार करुन मग गार करत ठेवायची. काजू आणि बदाम किसून किंवा बारीक चिरुन घ्यायची. लस्सी वर घालायचे. मस्त गारेगार लस्सीचा आस्वाद घ्या.