रणरणत्या उन्हात जड अन्न खाण्यापेक्षा काहीतरी हलकं आणि जिभेला चव देणारं खावंसं वाटतं. अशा वेळी घरातील लहानांपासून मोठ्यांपर्यंत सर्वांना आवडेल अशी रेसिपी म्हणजे 'कैरीची सुकी भेळ'. ही भेळ चवीला आंबट-गोड-तिखट अशी भन्नाट लागते आणि कमी कॅलरी असल्यामुळे डाएट करणाऱ्यांसाठी एक उत्तम स्नॅक्स आहे.
साहित्य :
कुरमुरे (चुरमुरे): ४-५ वाट्या
कैरी: अर्धी (बारीक चिरलेली)
कांदा: १ मध्यम (बारीक चिरलेला)
टोमॅटो: १ लहान (बारीक चिरलेला)
बारीक शेव: गरजेनुसार
मसाल्यासाठी: मूठभर पुदिना, कोथिंबीर, २-३ हिरव्या मिरच्या, मीठ आणि थोडी साखर.
सर्व्हींगसाठी : बारीक चिरलेली कोथिंबीर, मसाला शेंगदाणे
कृती :
१. कोरडे वाटण तयार करा: सर्वप्रथम मिक्सरच्या भांड्यात पुदिना, कोथिंबीर, हिरवी मिरची, चवीनुसार मीठ आणि साखर घ्या. यात पाण्याचा वापर न करता कोरडे मिश्रण तयार करून घ्या. यामुळे सुकी भेळेची लज्जत वाढते.
२. मिश्रण एकत्र करा: एका मोठ्या भांड्यात कुरमुरे घ्या. त्यात बारीक चिरलेला कांदा, टोमॅटो आणि कैरीचे तुकडे घाला.
३. मसाला मिक्स करा: आता तयार केलेले हिरवे वाटण कुरमुऱ्यांवर घालून सर्व मिश्रण व्यवस्थित एकजीव करून घ्या.
४. फायनल टच: वरून चवीनुसार मीठ, साखर आणि बारीक शेव घाला. तुम्ही यात मसाला शेंगदाणेही घालू शकता.
५. सर्व्ह करा: ही भेळ तयार झाल्याबरोबर बारीक चिरलेली कोथिंबीर घालून लगेच आस्वाद घ्या.
ही भेळ 'डाएट फ्रेंडली' का आहे?
लो कॅलरी: कुरमुरे पचायला हलके असतात.
फायबर आणि व्हिटॅमिन्स: कैरी, कांदा आणि टोमॅटोमुळे शरीराला नैसर्गिक फायबर आणि व्हिटॅमिन सी मिळते.
तेलाचा शून्य वापर: या रेसिपीमध्ये कुठेही तेलाचा वापर केलेला नाही, ज्यामुळे ही एक 'गिल्ट-फ्री' स्नॅक डिश ठरते.