महाशिवरात्रीचा उपवास म्हटला की घराघरात विविध पदार्थ केले जातात. उपासाच्या दिवशी जिभेचे चोचले कमी नाही तर जास्तच पुरवले जातात. उपासाचे पदार्थ खरं तर मस्त चविष्टच असतात. त्यामुळे नक्की करायला हवेत. जे उपास करत नाहीत ते ही आवडीने खातात. उपासाच्या दिवशी साबुदाण्याला मागणी फार असते. साबुदाणा खिचडी, वडा, थालीपीठ असे पारंपरिक पदार्थ हमखास केले जातात. वर्षानुवर्षे तेच ते पदार्थ खाल्ले जात असल्यामुळे कधी कधी काहीतरी वेगळं, पण उपासाला चालेल असं खावंसं वाटतं. अशा वेळी मस्त, चविष्ट साबुदाणा डोसा हा एक उत्तम पर्याय ठरु शकतो.
साबुदाणा उपवासात ऊर्जा देणारा पदार्थ मानला जातो. त्यापासून तयार होणारा डोसा बाहेरुन हलका कुरकुरीत आणि आतून मऊसर लागतो. हा पदार्थ चवीला जेवढा मस्त तेवढाच करायला सोपाही आहे. खिचडी किंवा वड्यांपेक्षा हा पर्याय थोडा हटके ठरतो. त्यामुळे या वेळी काहीतरी वेगळे ट्राय करुन पाहा. तुम्हाला नक्कीच आवडेल.
साहित्य
साबुदाणा, हिरवी मिरची, तूप, जिरे, पाणी, मीठ, बटाटा
कृती
१. बटाटा छान उकडून घ्यायचा. हिरव्या मिरचीचे तुकडे करायचे साबुदाणा हलकासा भाजून घ्यायचा आणि गार करायचा. एका मिक्सरच्या भांड्यात साबुदाणा उकडलेल्या बटाट्याचे तुकडे आणि हिरव्या मिरचीचे तुकडे घ्यायचे. त्यात चवीनुसार मीठ घालायचे. जिरे घालायचे. पाणी घालायचे. आणि पेस्ट वाटून घ्यायची. सगळे पदार्थ छान एकजीव वाटायचे. जास्त घट्ट नको आणि पातळही, मध्यम प्रमाणाचे पीठ तयार करायचे.
२. मिश्रणात चवीनुसार मीठ घालायचे. छान ढवळून घ्यायचे, तवा गरम करायचा, त्याला तेल लावायचे. तयार मिश्रण त्यावर लावायचे दोन्ही बाजूंनी मस्त खमंग परतून घ्यायचे. अगदी काही मिनिटांत होणारी रेसिपी आहे.