Eknath Shinde: शहाजीबापूच्या कलागुणांना गुवाहाटीत वाव मिळाला, मुख्यमंत्रीच म्हणाले Okks

Eknath Shinde: आपल्या भाषणाची सुरुवात करतानाच एकनाथ शिंदेंनी गुवाहाटीतील घडलेल्या प्रसंगांची आठवण करुन दिली

मुंबई - मुख्यमंत्री आणि बंडखोर नेते एकनाथ शिंदे यांनी गेल्या 2 दिवसांपासून आमदारांच्या कार्यकर्त्यांशी संवाद साधण्याचा धडाकाच लावला आहे. राजधानी मुंबईच्या कुर्ला विधानसभा मतदारसंघाचे आमदार मंगेश कुडाळकर यांच्या मतदारसंघात आयोजित करण्यात आलेल्या कार्यकर्ता मेळाव्यात आज पुन्हा एकदा मुख्यमंत्र्यांनी जल्लोषात भाषण केले. यावेळी, गुवाहाटीतील अनेक किस्से आणि मनोरंजक प्रवास त्यांनी उलगडला. यावेळी, सांगोल्याचे आमदार शहाजाबापू पाटील यांच्या डायलॉगचा ओक्के संवादही केला. 

आपल्या भाषणाची सुरुवात करतानाच एकनाथ शिंदेंनी गुवाहाटीतील घडलेल्या प्रसंगांची आठवण करुन दिली. गुवाहाटीत आम्ही सगळे आमदार मजेत होतो. इथे बसलेत त्यांना विचारा, आमचं सगळं ओक्केमधीच होतं. शहाजीबापू एवढा ओक्के आहे ते आम्हाला माहितीच नव्हतं. शहाजीबापूंच्या कलागुणांना गुवाहाटीत वाव मिळाला. सोशल मीडियात, मीडियात ते सगळे फेमस झाले, टी शर्ट निघाले, गाणं आलं. गुवाहाटीच्या टुरिझमचा प्रचार झाला, तिकडचे मुख्यमंत्री, मंत्री म्हणाले याला आपण इकडे पर्यटनमंत्री बनवुया... अशी फटकेबाजी मुख्यमंत्री एकनाथ शिंदेंनी केली. त्यावेळी, समोरच्या लोकांनीही हसून दाद दिली. 

मुंबई येथील कुर्ला विधानसभा मतदारसंघाचे आमदार @mlamangesh यांच्या मतदारसंघात आयोजित करण्यात आलेल्या भव्य कार्यकर्ता मेळाव्यात उपस्थित राहून मोठ्या संख्येने जमलेल्या नागरिक आणि कार्यकर्त्यांशी संवाद साधला.#realshivsenapic.twitter.com/Sq9aYkEmdT

— Eknath Shinde - एकनाथ शिंदे (@mieknathshinde) July 16, 2022

पुढे बोलताना ते म्हणाले, प्रत्येक आमदाराच्या मतदारसंघात केलेली कामेच त्यांना पुन्हा निवडून आणतीलच, त्यातील प्रत्येक आमदाराला पुन्हा निवडून आणल्याशिवाय आपण स्वस्थ बसणार नाही, असे एकनाथ शिंदेंनी यावेळी म्हटले. दरम्यान, याप्रसंगी आमदार प्रकाश सुर्वे, आमदार बालाजी कल्याणकर, आमदार संजय शिरसाट, अभिनेते दिगंबर नाईक, स्थानिक पदाधिकारी तसेच कार्यकर्ते मोठ्या संख्येने उपस्थित होते.