25 thousand MW unconventional power generation by 2025 | 25 हजार मेगावॅट अपारंपरिक ऊर्जानिर्मिती 2025 पर्यंत

25 हजार मेगावॅट अपारंपरिक ऊर्जानिर्मिती 2025 पर्यंत



लोकमत न्यूज नेटवर्क
मुंबई : २०२५ पर्यंत २५ हजार मेगावॅट अपारंपरिक ऊर्जानिर्मितीचे उद्दिष्ट ठरविण्यात आले आहे. त्यापैकी ९ हजार ३०५ मेगावॅट क्षमतेचे अपारंपरिक ऊर्जा प्रकल्प कार्यान्वित झाले आहेत. २ हजार मेगावॅट क्षमतेचे प्रकल्प प्रगतिपथावर आहे. सौर ऊर्जेच्या माध्यमाने शेतकऱ्यांना दिवसा ८ तास वीज उपलब्ध होईल.
ग्रीन हाऊस गॅसेसचा परिणाम कमी करणे, शहरातील प्रदूषणाला आळा घालण्यासाठी ई-व्हेईकलचे धोरण राबविण्यात येत असून, राज्यात नागपूर-मुंबई समृद्धी महामार्ग, मुंबई-पुणे द्रुतगती महामार्ग व मुंबई-नाशिक महामार्गावर मेगा इलेक्ट्रिक व्हेइकल चार्जिंग सेंटर स्थापन करण्यात येणार असून, यासाठी ९ हजार ४५३ कोटी खर्च करण्यात येतील.
थकीत वीज बिलात शेतकऱ्यांना ३३ टक्के सूट देण्यात आली आहे. शेतकऱ्यांनी उर्वरित थकबाकीपैकी ५० टक्के रकमेचा भरणा मार्च २०२२ पर्यंत केल्यास त्यांना राहिलेल्या ५० टक्के रकमेची अतिरिक्त माफी देण्यात येईल. ४४ लाख ३७ हजार शेतकऱ्यांना मूळ थकबाकी रकमेच्या जवळपास ६६ टक्के, म्हणजे ३० हजार ४११ कोटी रक्कम माफ केली जाईल.
कृषीपंप वीज जोडणी धोरण ही योजना राबविण्याकरिता महावितरण कंपनीला दरवर्षी १ हजार ५०० कोटी रुपये निधी भागभांडवलाच्या स्वरूपात दिले जातील.
वीज केंद्रांची उत्पादन क्षमता ९५ टक्के गाठण्याचे लक्ष्य
लोकमत न्यूज नेटवर्क
मुंबई : राज्य वीज नियामक आयोगाने वीज केंद्रांची उत्पादन क्षमता किमान ८५ टक्के असायला हवी, असे बंधन घातले असतानाच ही क्षमता किमान ९५ टक्के गाठण्याचे लक्ष्य ठरविण्यात आले आहे. त्यानुसार कालबद्ध कार्यक्रम आखून वेळोवेळी आढावा घेतला जात असून, गुणवत्तापूर्ण कोळसा न देणाऱ्या कंपन्यांवर कारवाई करण्याच्या सूचना देण्यात आल्या आहेत. शिवाय कमी गुणवत्तेच्या कोळशामुळे वीजनिर्मिती क्षमतेतील घट थांबविण्याचा प्रयत्न केला जात आहे.
वीजनिर्मितीमध्ये कोळसा व्यवस्थापन सर्वांत महत्त्वाचे असते. आजघडीला राज्यातील औष्णिक केंद्रांची निर्मिती क्षमता वाढविण्यावर लक्ष केंद्रित करण्यात आले आहे. राज्यातील औष्णिक वीज केंद्राची उत्पादन क्षमता अर्थात प्लांट लोड फॅक्टर वाढविण्यावर लक्ष केंद्रित करण्यात आले आहे. ६ जानेवारी २०२० रोजी महानिर्मितीचे एकूण वीज उत्पादन ६ हजार ८२१ मेगावॅट होते. यात ४ हजार ८०४ मेगावॅट औष्णिक वीजनिर्मितीचा समावेश होता. ९ मार्च २०२१ रोजी एकूण वीज उत्पादन १० हजार ४४५ मेगावॅट असून यात ७ हजार ९९१ मेगावॅट औष्णिक विजेचा समावेश आहे. औष्णिक वीज उत्पादन जवळपास दुपटीने वाढले असून, एकूण वीज उत्पादन हे जवळपास ४ हजार मेगावॅटने वाढले आहे. 

वाचकहो, 'लोकमत'ला टेलिग्रामवर फॉलो करताय ना?... अजून जॉईन केलं नसेल तर क्लिक करा ( @LokmatNews ) आणि मिळवा महत्त्वाचे अपडेट्स अन् ताज्या बातम्या!

Web Title: 25 thousand MW unconventional power generation by 2025

Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.