"गेल्या ६ ते ८ महिन्यांपासून तणाव, चिंता...", प्रियदर्शन जाधवची पोस्ट चर्चेत, चाहते काळजीत 

"गेल्या ६ ते ८ महिन्यांपासून तणाव, चिंता...", प्रियदर्शन जाधवची पोस्ट व्हायरल, म्हणाला-" वाईट नशीब..."

Priyadarshan Jadhav Post:प्रियदर्शन जाधव (priyadarshan jadhav) हा मराठी मनोरंजनविश्वातील लोकप्रिय अभिनेता आहे.  प्रियदर्शन जाधव हा उत्तम अभिनेता असण्यासोबत लेखन आणि दिग्दर्शनातही तो उत्तम आहे.'टाईमपास २' या चित्रपटातून तो महाराष्ट्रातील घराघरात पोहोचला. आतापर्यंत त्याने चित्रपट अनेक टीव्ही शो तसेच नाटक अशा तिन्ही माध्यमातून प्रेक्षकांचं मनोरंजन केलं आहे.अशातच नुकतीच अभिनेत्याने सोशल मीडियावर शेअर केलेल्या एका पोस्टने चाहत्यांचं लक्ष वेधून घेतलंय. प्रियदर्शनची ही पोस्ट पाहून त्याचे चाहते चिंतेत आहेत.

दरम्यान, प्रियदर्शन जाधवने त्याच्या इन्स्टाग्राम अकाउंटवर एक पोस्ट शेअर केली आहे. त्यामध्ये अभिनेत्याने लिहिलंय,  "गेल्या सहा ते आठ महिन्यांपासून मी तणाव, चिंता, नैराश्याचा अनुभव घेत आहे, काम करुन थकलो आहे, नवीन चित्रपट केला नाही. नाटक केलं नाही किंवा टेलिव्हिजनवरही काही नवीन नाही, नाटक लिहिलं नाही, चित्रपट लिहिला नाही. एकाग्रतेचा अभाव, कामाचे प्रकल्प उशिरा सुरु होत आहेत, रिलीज होण्यास उशीर होत आहे. लोकांपासून दूर पळून जात आहे, खूप आनंदी असतो आणि त्याच वेळी वैयक्तिक पातळीवर अत्यंत असुरक्षित असतो, रागावलेला असतो. तसेच ध्येयहीन दिवस असतो, कधीकधी झोपेचा अभाव असतो. या सर्व गोंधळात यूएसए टूर माझ्यासाठी एक वरदान होती. हा फोटो लास वेगासमध्ये काढला आहे." 

यापुढे अभिनेत्याने लिहिलंय,"मी संपूर्ण रात्र कॅसिनोमध्ये माझे नशीब आजमावत जागा होतो आणि आश्चर्याची गोष्ट म्हणजे मी २०३ डॉलर्स जिंकलो, पैसे घेतले आणि आम्ही सर्वजण अ‍ॅरिझोना ग्रँड केनियाला गेलो आणि खूप मजा केली. म्हणून कधीकधी अशांत काळात विनोद अशक्य गोष्टीवर विजय मिळवू शकतो. प्रेम तुम्हाला कोणत्याही गोष्टीतून मार्ग काढून देऊ शकते. वाईट नशीब आवाज करतं, पण शहाणपणाला शांतपणे माघार कधी घ्यायची हे माहित असतं. मला आशा आहे की सर्वकाही ठीक होईल". अशा आशयाची पोस्ट लिहून अभिनेत्याने मनातील भावना व्यक्त केल्या आहेत.