"सगळ्यांची डोकी आता फिरली आहेत...", सूरजच्या लग्नात जान्हवी किल्लेकर का संतापली?

सूरज चव्हाणच्या लग्नात आले 'बिन बुलाए बाराती'! मोठी गर्दी उसळली

'बिग बॉस मराठी ५'चा विजेता सूरज चव्हाण काल लग्नबंधनात अडकला. संजना गोफणेशी त्याने लग्नगाठ बांधली. सूरजचं पुण्यातील सासवड येथे धूमधडाक्यात लग्न पार पडलं. गावागावात त्याचा मोठा चाहतावर्ग आहे. मोठ्या संख्येने अगदी बिन बुलाए बारातीही त्याच्या लग्नाला आले. लग्नात ५० सुरक्षारक्षरही तैनात होते. तरी गर्दी नियंत्रणात येतच नव्हती. सर्वत्र गडबड गोंधळ सुरु होता. या सगळ्यात सूरजची करवली म्हणून मिरवत असलेली 'बिग बॉस'मधली किलर गर्ल जान्हवी किल्लेकर पाहुण्यांवर चांगलीच भडकली. तिचा व्हिडीओ आता व्हायरल होतोय.

सूरज चव्हाणच्या लग्नाला बिग बॉसमध्ये जान्हवी किल्लेकर, पुरुषोत्तम दादा पाटील, योगिता चव्हाण, धनंजय पोवार यांची उपस्थिती होती. निळ्या रंगाच्या भरजरी घागरा परिधान करुन जान्हवी पोहोचली. सूरजची करवली म्हणूनच ती अख्ख्या लग्नात मिरवत होती. दरम्यान लग्नात मोठी गर्दी उसळली. लग्न लागण्याअगोदरच गडबड, गोंधळ सुरु होता. ते पाहून जान्हवी चांगलीच संतापली. रागारागात ती म्हणाली,"आपण लग्नाला आलो आहोत. त्याचं लग्न तर लागू द्या. त्याचं लग्न लागू नये असं वाटतंय का तुम्हाला? तो आतमध्ये वैतागून बसलाय यार..प्लीज..थोडा धीर धरा. मी हात जोडून नमस्कार करते..कृपया शांत बसा...खरंच सगळ्यांची डोकी आता फिरली आहेत. विनंती करते आता प्लीज सूरजला बाहेर येऊ द्या. कोणीच काहीही बोलू नका."

जान्हवीने सर्वांना सुनावल्यानंतर मंडळी काहीशी शांत झाली. सर्वांनी तिला सहकार्य केलं. नंतर तिने वातावरण हलकं करण्यासाठी 'मी कशी दिसतेय?' असा प्रश्न विचारला. जान्हवी सूरजच्या लग्नात सुरुवातीपासून शेवटपर्यंत होती. त्यामुळे काहींनी तिचं कौतुक केलं तर काही जणांनी तिला ट्रोलही केलं. तर दुसरीकडे अंकिता वालावलकर सूरजच्या लग्नात न आल्याने सगळ्यांनीच आश्चर्य व्यक्त केलं.