होय मी डेट करतेय! EaseMyTrip फाउंडरसोबतच्या व्हायरल फोटोनंतर कंगनाची कबुली, म्हणते- "योग्य वेळेला..."

कंगना आणि निशांत पिट्टी डेट करत असल्याच्या चर्चांना उधाण आलं होतं. आता याबाबत कंगनाने पोस्ट शेअर केली आहे. 

बॉलिवूडची क्वीन कंगना रणौत पुन्हा एकदा तिच्या वैयक्तिक आयुष्यामुळे चर्चेत आली आहे. मिस्ट्री मॅननंतर कंगनाचे EaseMyTrip च्या फाउंडरसोबतचे फोटो व्हायरल झाले होते. कंगना आणि EaseMyTripचे फाउंडर निशांत पिट्टी यांनी अयोध्येतील राम मंदिर प्राणप्रतिष्ठा सोहळ्याला हजेरी लावली होती. त्यादरम्यानचे त्यांचे काही फोटो समोर आले होते. या फोटोंमुळे पुन्हा कंगनाच्या डेटिंगच्या चर्चा रंगल्या होत्या. कंगना आणि निशांत पिट्टी डेट करत असल्याच्या चर्चांना उधाण आलं होतं. आता याबाबत कंगनाने पोस्ट शेअर केली आहे. 

कंगनाने तिच्या इन्स्टाग्राम अकाऊंटवरुन तिचा आणि निशांत पिट्टी यांचा व्हायरल फोटो शेअर केला आहे. हा फोटो शेअर करत कंगनाने डेट करत असल्याचं कबुल केलं आहे. पण, कंगना निशांत शेट्टी यांना डेट करत नसून वेगळ्याच कोणत्या तरी व्यक्तीला डेट करत आहे. इन्स्टा स्टोरीमध्ये कंगना म्हणते, "मीडियाला मी विनंती करते की त्यांनी चुकीची माहिती पसरवू नये. निशांत पिट्टी हे विवाहित आहेत. आणि मी कोणत्या तरी दुसऱ्या व्यक्तीला डेट करत आहे. योग्य वेळेला मी सांगेन. फक्त फोटो काढले म्हणून एका तरुणीचं नाव रोज नव्या व्यक्तीबरोबर जोडणं बरोबर नाही. कृपया हे करू नका." कंगनाच्या या पोस्टमुळे ती निशांत पिट्टी यांना डेट करत नसल्याचं स्पष्ट झालं आहे. पण, कंगना नक्की कोणाला डेट करतेय याबाबत तिने अद्याप कोणतीही माहिती दिलेली नाही. 

काही दिवसांपूर्वीच कंगनाचा मिस्ट्री मॅनसोबतचा फोटो व्हायरल झाला होता. तेव्हादेखील कंगनाच्या डेटिंगच्या चर्चांना उधाण आलं होतं. तेव्हा कंगनाने याबाबत पोस्ट शेअर करत मिस्ट्री मॅनचा उलगडा करत तो हेअरस्टायलिश असल्याचं सांगितलं होतं. त्यानंतर आता पुन्हा डेटिंगच्या चर्चा रंगल्याने कंगनाने पोस्ट शेअर करत याबाबत स्पष्टीकरण दिलं आहे. 

दरम्यान, निशांत पिट्टी हे EaseMyTripचे सीईओ आहेत. मालदीवबरोबर झालेल्या वादामुळे ते चर्चेत आले होते. मालदीव वादानंतर त्यांनी EaseMyTrip वरील मालदीवच्या सगळ्या बुकींग रद्द केल्या होत्या. दरम्यान, राम मंदिर प्राणप्रतिष्ठेनंतर कंगनाने तिच्या आगामी 'इमर्जन्सी' सिनेमाची रिलीज डेटही जाहीर केली आहे. १४ जूनला कंगनाचा 'इमर्जन्सी' सिनेमा प्रदर्शित होणार आहे. या सिनेमाचं दिग्दर्शन कंगनाने केलं असून आणीबाणीच्या काळावर यातून भाष्य करण्यात आलं आहे. 'इमर्जन्सी'मध्ये कंगनाने भारताच्या पहिल्या महिला पंतप्रधान इंदिरा गांधी यांची भूमिका साकारली आहे.