खरचं येणार का ‘अंदाज अपना अपना’चा सिक्वल??
By ऑनलाइन लोकमत | Updated: June 15, 2016 19:39 IST
‘अंदाज अपना अपना’!! सुमारे २२ वर्षांपूर्वी आलेला हा विनोदी चित्रपट आजही बॉलिवूड प्रेमींच्या मनात जिवंत आहे. आमीर खान, सलमान ...
खरचं येणार का ‘अंदाज अपना अपना’चा सिक्वल??
‘अंदाज अपना अपना’!! सुमारे २२ वर्षांपूर्वी आलेला हा विनोदी चित्रपट आजही बॉलिवूड प्रेमींच्या मनात जिवंत आहे. आमीर खान, सलमान खान, रविना टंडन, करिश्मा कपूर, शक्ती कपूर आणि परेश रावल यांच्या प्रमुख भूमिका असलेला हा चित्रपट आजही खळखळून हसवतो. ‘अंदाज अपना अपना’चा सिक्वल येतोय, अशी बातमी आहे. पण कदाचित ही बातमीही अफवाच ठरण्याची शक्यता आहे. कारण याआधीही अनेकदा ‘अंदाज अपना अपना’चा सिक्वल येतोय, अशा बातम्या आल्यात. पण प्रत्येकवेळी त्या अफवाच ठरल्या. ‘अंदाज अपना अपना’चे दिग्दर्शक राजकुमार संतोषी यांनी स्वत: आपण या चित्रपटाचा रिमेक बनवणार नसल्याचे यापूर्वीच एका मुलाखतीत सांगितले होते. ‘अंदाज अपना अपना’ने प्रेक्षकांना खळखळून हसवलयं..हा चित्रपट आणि त्याच्याआठवणी प्रेक्षकांच्या मनात तशाच जिवंत राहाव्यात अशीच माझी इच्छा आहे आणि त्यामुळेच या चित्रपटाचा मी कधीही सिक्वल वा रिमेक बनवणार नाही, असे संतोषी या मुलाखतीत म्हणाले होते. एवढेच नाही तर आमीर खान आणि सलमान खान ‘अंदाज अपना अपना’साठी एकत्र आलेत. पण यापुढे ते असे एकत्र येण्याची शक्यता फार कमी आहे किंबहुना नाहीच, असेही संतोषी म्हणाले होते. कदाचित ते खरेही होते. त्याचमुळे गेल्या २२ वर्षांत ‘अंदाज अपना अपना’चा सिक्वल वा रिमेक येतोय, अशा अनेक बातम्या आल्या. पण शेवटी त्या अफवाच ठरल्या. प्रेक्षकांना ‘अंदाज अपना अपना’चा सिक्वल वा रिमेक पाहायला आवडेल का, हे सांगता येणार नाही. पण ‘अंदाज अपना अपना’चा अंदाजच काही और होता आणि आहे, हे मात्र तेवढेच खरे!!