ऋषभची नक्कल, 'कांतारा'तील देवीचा उल्लेख 'भूत' असा केला; रणवीर सिंहवर नेटकरी भडकले

तुझ्या अंगात फिमेल भूत येतं तेव्हा...रणवीर हे काय बोलून गेला?

ऋषभ शेट्टीचा 'कांतारा' ब्लॉकबस्टर आहे. नुकताच त्याचा 'कांतारा चॅप्टर १'ही गाजला. या सिनेमाने ऋषभला ग्लोबल स्टार बनवलं. त्याचा अभिनय पाहून चाहत्यांच्या अंगावर अक्षरश: शहारे आले. 'कांतारा'ची गोष्ट कर्नाटकमधील तुलू समाजाच्या देवांवर आधारित आहे. तेथील लोकांची त्यांच्या देवांवर खूप श्रद्धा आहे. यामुळेच दरवर्षी ते लोक देवी देवतांचा सण उत्साहात साजरा करतात. अशातच नुकतंच रणवीर सिंहने मात्र देवीच्या जागी तिचा 'भूत' असा उल्लेख केला. यामुळे तो नेटकऱ्यांच्या निशाण्यावर आला आहे.

गोवा फिल्म फेस्टिवलमध्ये रणवीर सिंहनेही हजेरी लावली. त्याच्या आगामी 'धुरंधर' सिनेमाच्या प्रमोशनसाठी तो आला होता. यावेळी त्याने समोर बसलेल्या ऋषभ शेट्टीच्या 'कांतारा'ची स्तुती केली. ऋषभच्या अभिनयाचीही स्तुती केली. मात्र त्याने देवीच्या जागी भूत असा उल्लेख केला आणि ऋषभची नक्कलही केली ज्यावर आता लोक भडकले आहेत. रणवीर म्हणाला,'मी तुझा सिनेमा थिएटरमध्ये बघितला आणि खरं सांगू तर तुझा अभिनय शानदार होता. विशेषत: जेव्हा तुझ्या अंगात फीमेल भूत येतं तो एक शॉटच भारी होता. तुम्ही कांतारा पाहिला का? तो शॉट पाहिला का...? कोणाला मला कांतारा ३ मध्ये बघायची इच्छा आहे? याला सांगा...'.

रणवीरने केलेल्या नकलेवर  ऋषभ शेट्टीलाही हसू येतं. पण त्याच्या मागे बसलेल्या लोकांच्या चेहऱ्यावर स्पष्ट निराशा दिसते.  नेटकरीही रणवीरवर भडकले आहेत. चावुंडी देवीचा उल्लेख फीमेल भूत असा केल्याने नेटकऱ्यांनी रणवीरला धारेवर धरलं आहे. तसंच रणवीरने ऋषभची मजेशीर अंदाजात नक्कल केली यावरही चाहते भडकले आहेत. याचा परिणाम रणवीरच्या धुरंधरवर होईल अशी अनेकांनी प्रतिक्रिया दिली आहे. 

'कांतारा चॅप्टर १' अमेझॉन प्राईमवर रिलीज झाला आहे. तर धुरंधर सिनेमा ५ डिसेंबर रोजी थिएटरमध्ये रिलीज होत आहे. आदित्य धर दिग्दर्शित या सिनेमात रणवीरसह संजय दत्त, अर्जुन रामपाल, आर माधवन आणि अक्षय खन्ना अशी तगडी स्टारकास्ट आहे.