बॉलिवूडचे पहिले सुपरस्टार राजेश खन्ना आज आपल्यात नाहीत. पण त्यांचे चित्रपट, त्यांच्या भूमिका कायम प्रेक्षकांच्या मनात जिवंत असतील. 1969 ते 1971 या काळात राजेश खन्ना यांनी 15 सोलो हिट सिनेमे दिलेत. यानंतर त्यांना बॉलिवूडचे पहिले सुपरस्टार म्हणून ओळखले जाऊ लागले. आज हे सांगण्याचे कारण म्हणजे, आज राजेश खन्ना यांचा वाढदिवस. 29 डिसेंबर 1942 रोजी जन्मलेल्या राजेश खन्ना यांनी त्याकाळातल्या अनेक अभिनेत्रींसोबत काम केले. यातील काही अभिनेत्रींसोबत राजेश खन्ना यांचे नाव जोडले गेले. यात अभिनेत्री टीना मुनिमचेही नाव होते.
राजेश खन्ना आणि टीना मुनिम या जोडीने एकाहून एक सरस चित्रपट दिलेत. ‘सौतन’च्या सेटवर दोघांमध्ये जवळीक वाढु लागली. दोघांचीही मैत्रीचे रूपांतर प्रेमात कधी झाले हे दोघांनाही कळले नाही. दोघेही एकाच टुथब्रशचा वापर करण्यापर्यंत हे नाते पुढे गेले होते. टीनाला राजेश खन्ना यांच्याशी लग्न करायचे होते. राजेश खन्ना खरे तर विवाहित होते. पण याऊपरही त्यांनी टीनाला लग्न करण्याचे वचन दिले होते. पण प्रत्यक्षात पत्नी डिंपलला घटस्फोट देण्यास राजेश खन्नाचे मन कधीही धजावले नाही. अखेर टीना वाट पाहून थकली. राजेश खन्ना यांच्या खोट्या आश्वासनांना कंटाळून तिने राजेश खन्ना यांच्यासोबतचे नाते संपवण्याचा निर्णय घेतला. 1987 मध्ये दोघांचेही ब्रेकअप झाले.