वयाच्या ४२ व्या प्रेग्नंट, तरी जिममध्ये हेवी वर्कआउट करतेय अभिनेत्री; नेटकऱ्यांनी दिला सल्ला

अभिनेत्रीच्या व्हिडीओवर कमेंट्सचा पाऊस

टीव्ही अभिनेत्री करिश्मा तन्नाने काही दिवसांपूर्वीच प्रेग्नंसीचा खुलासा केला. वयाच्या ४२ व्या वर्षी ती बाळाला जन्म देणार आहे. करिश्मावर शुभेच्छांचा वर्षाव झाला. सुडौल बांधा, कमालीची उंची आणि सुंदर व्यक्तिमत्वामुळे करिश्मा तन्ना ओळखली जाते. तिच्या अभिनयाचंही खूप कौतुक होतं. करिश्मा फिटनेसबाबत खूप जागरुक आहे. मात्र आता प्रेग्नंसीतही ती हेवी वर्कआऊट करताना दिसत आहे. यावरुन नेटकऱ्यांनी तिला ट्रोल केलं आहे. 

करिश्मा तन्नाने इन्स्टाग्रामवर जिममधला व्हिडीओ शेअर केला आहे. यामध्ये ती जड डंबेल्स उचलताना दिसत आहे. वेटलिफ्टिंग करत आहे. इंटेन्स वर्कआउट करत आहे."चला वर्कआउट करूया, मी जिममधील व्हिडिओ पोस्ट करणं खूप मिस करत होते," असं कॅप्शन तिने या व्हिडिओला दिलं आहे. या व्हिडिओमध्ये तिचा बेबी बंप स्पष्टपणे दिसून येत असून अभिनेत्रीच्या फिटनेसचं सर्वत्र कौतुक होत आहे. मात्र काहींनी तिला काळजी घेण्याचाही सल्ला दिला आहे.

करिश्माचा हा वर्कआउट व्हिडिओ पाहून अनेक नेटकऱ्यांनी काळजी व्यक्त करत तिला इशाराही दिला आहे. एका युजरने लिहिले की, "कृपया असे करू नका, देवाने तुम्हाला या वयात आई होण्याचं वरदान दिलं आहे, त्यामुळे इतकी जोखीम घेऊ नका." तर दुसऱ्या एकाने "आधी बाळाची काळजी घ्या, ४२ व्या वर्षी इतका धोका पत्करणं योग्य नाही," अशा कमेंट्स करत तिला प्रेग्नेंसीमध्ये जपून राहण्याचा सल्ला दिला आहे. चाहत्यांच्या या संमिश्र प्रतिक्रियांमुळे हा व्हिडिओ सध्या सोशल मीडियावर तुफान व्हायरल होत आहे.

करिश्मा तन्नाने ६ एप्रिल रोजी पती वरुण बंगेरासोबत एक खास पोस्ट शेअर करत ती प्रेग्नेंट असल्याची आनंदाची बातमी चाहत्यांना दिली होती. ऑगस्ट २०२६ मध्ये त्यांच्या घरी चिमुकल्या पाहुण्याचे आगमन होणार आहे. करिश्मा सध्या आपल्या आयुष्यातील या सर्वात सुंदर टप्प्याचा मनसोक्त आनंद घेत असून, प्रेग्नेंसीमध्येही ती स्वतःला फिट ठेवण्यासाठी मेहनत घेत आहे.

करिश्मा आणि व्यावसायिक वरुण बंगेरा यांचा विवाह ५ फेब्रुवारी २०२२ रोजी पार पडला होता. या दोघांची पहिली भेट २०१८ मध्ये झाली होती आणि त्यानंतर वरुणने तिला दुबईमध्ये प्रपोज केले होते. आता लग्नाच्या चार वर्षानंतर हे जोडपे आपल्या पहिल्या बाळाच्या स्वागतासाठी सज्ज झाले आहे. करिश्माच्या या जिद्दीचे आणि फिटनेस प्रेमाचे तिचे काही सहकारी कलाकार मात्र कौतुक करत आहेत.